बाल लैंगिक अत्याचार प्रकरणी; केस दडपण्यासाठी लाच मागणाऱ्या PSI ला बेड्या
पुणे – बाल लैंगिक अत्याचाराच्या (पोस्को) गुन्ह्यात आरोपी न करण्यासाठी एक लाख रूपयांच्या लाचेची मागणी करीत तडजोडीअंती 35 हजाराची मागणी करणाऱ्या एका पोलिस उपनिरीक्षकाला लाचलुचपत प्रतिबंधक विभागाच्या (एसीबी) पथकाने अटक केली. त्याच्याविरुद्ध येरवडा पोलिस ठाण्यात गुन्हा दाखल करण्यात आला आहे.
प्रशांत कोंडीराम किर्वे असे अटक केलेल्या पोलिस उपनिरीक्षकाचे नाव आहे. किर्वे हा येरवडा येथील लक्ष्मीनगर पोलिस चौकीत कार्यरत आहे. याप्रकरणी एका पोस्कोच्या गुन्ह्यात तक्रारदाराला व त्यांच्या आईला आरोपी न करण्यासाठी पोलिस उपनिरीक्षक किर्वे याने एक लाखाच्या लाचेची मागणी केली होती. परंतु, तक्रारदाराला लाच देणे मान्य नसल्याने त्यानी याबाबत एसीबीकडे तक्रार केली. त्यानंतर किर्वे यास 35 हजाराची लाच मागताना अटक करण्यात आले. गुन्ह्याचा तपास सहायक पोलिस आयुक्त विजयमाला पवार करत आहे.