‘नको हिंदुत्व, हवे बंधुत्व’, कॅब आणि एनआरसी निषेधार्थ पुणे विद्यापीठात विद्यार्थ्यांची निदर्शने

पुणे |महाईन्यूज|

दिल्लीतील जामिया मिलिया इस्लामिया विद्यापीठ, अलिगढ विद्यापीठ आणि अन्य विद्यापीठातील विद्यार्थ्यांवर पोलिसांनी केलेली कारवाई आणि नागरिकत्व कायद्यातील सुधारणा (कॅब) आणि राष्ट्रीय नागरिकत्व नोंदणी मोहिमेच्या (एनआरसी) निषेधार्थ सावित्रीबाई फुले पुणे विद्यापीठातील विद्यार्थ्यांनी सोमवारी सायंकाळी निदर्शने केली. या वेळी विद्यार्थ्यांनी ‘युद्ध नको, बुद्ध हवा’, ‘नको हिंदुत्व, हवे बंधुत्व’ अशा आशयाचे फलक झळकवून केंद्राच्या विरोधात जोरदार घोषणाबाजी केली.

विद्यार्थ्यांवर झालेल्या कारवाईच्या पार्श्वभूमीवर विद्यापीठातील समविचारी विद्यार्थी संघटना एकत्र आल्या होत्या. या वेळी विद्यापीठातील अनिकेत कँटिनसमोर विद्यार्थ्यांनी निदर्शने केली. विद्यार्थ्यांवरील कारवाईच्या घटना लोकशाहीसाठी चिंताजनक असून, त्याचा निषेध करण्यात आला आणि केंद्र सरकारच्या धोरणांविरोधात लढणाऱ्या विद्यार्थ्यांना पाठिंबा दर्शविण्यात आला. समाजात धार्मिक तेढ निर्माण केली जात असून, विशिष्ट धर्माला लक्ष्य केले जात आहे, तसेच विद्यार्थ्यांवर कारवाई केली जात आहे. त्याविरोधात हे आंदोलन असल्याचे युवक काँग्रेसचे सतीश गोरे यांनी सांगितले.