दिव्यांग शिक्षकांना सेवेत कायम करा, अपंग आयुक्तालयासमोर आंदोलन

राज्यातील शंभरहून अधिक अंध शिक्षकांनी विविध मागण्यांसाठी पुणे ते मंत्रालय पायी प्रवास करत आंदोलनाचा निर्णय घेतला. शासनाला आपल्या व्यथा व वेदनांची जाणीव करून देण्यासाठी हे आंदोलन होणार होते. राज्यातील १७७ अंध शिक्षकांच्या विविध मागण्यांसाठी वारंवार पाठपुरावा करूनही निर्णय होत नसल्याने संतप्त झालेल्या या अंध शिक्षकांनी आंदोलनाचा पवित्रा घेतला.

त्यांच्या मागण्यांसाठी मुख्यमंत्री, शिक्षण मंत्री, सामाजिक न्याय विकास, अर्थ सचिव यांच्याशी वारंवार पत्र व्यवहार केले आहेत. मात्र, याबाबत तांत्रिक अडचणी असल्याचे सांगत आठ दिवसात हा प्रश्न सोडविण्याचे आश्वासन शिक्षण मंत्री विंनोद तावडे यांनी दिले होते. तरीही या आश्वासनाला दोन महिने झाल्यानंतरही कोणतीही कार्यवाही केली नसल्याचे विशेष शिक्षक हनुमंत जोशी यांनी सांगितले.

या आंदोलनात सहभागी झालेल्या अंध शिक्षकांची चिंचवडचे आमदार लक्ष्मण जगताप, नगरसेवक शितल शिंदे यांनी भेट घेवून त्यांच्या समस्या जाणून घेतल्या. यावेळी जगताप यांनी अंध व्यक्तींना या प्रकारे रस्त्यावर उतरून आंदोलन करण्याची गरज नसल्याचे सांगितले. आपल्या व्यथा, वेदना व गरजा यांचा निश्चितपणे विचार केला जाईल. या साठी  शासन स्तरावर संबंधित मंत्र्यांशी चर्चा करून आठ दिवसात प्रश्न मार्गी लावण्याचे आश्वासन दिले. समाजातील अंध-अपंग घटकाला न्याय देण्यासाठी येत्या अधिवेशनात यावर प्रश्न विचारुन चर्चा करणार असल्याचे जगताप यांनी सांगितले.