श्रीनगर: जम्मू-काश्मीरच्या पुलवामा आणि अनंतनागमध्ये आज पहाटे अतिरेक्यांनी केलेल्या हल्यात दोन पोलीस शहीद झाले असून सीआरपीएफचे १० जवान जखमी झाले आहेत. जखमी जवानांना रुग्णालयात उपचारासाठी दाखल करण्यात आले आहे.
पुलवामा कोर्ट परिसरात गार्ड पोस्टवर आज पहाटे दहशतवाद्यांनी अचानक हल्ला केला. या हल्ल्यात दोन पोलीस शहीद झाले आहेत. तर तीन जवान जखमी झाले आहेत. या हल्ल्यानंतर दहशतवाद्यांनी पोलिसांची शस्त्रे घेऊन तिथून पलायन केले. दरम्यान, पुलवामामध्ये पोलीस आणि सीआरपीएफच्या जवानांनी सर्च ऑपरेशन सुरू केले आहे.
पुलवामापाठोपाठ दहशतवाद्यांनी अनंतनागमध्येही सीआरपीएफच्या जवानांवर हल्ला केला. अनंतनागच्या जंगलात मंडीमध्ये गस्तीवर असलेल्या सीआरपीएफच्या जवानांवर दहशतवाद्यांनी ग्रेनेड फेकले. त्यात १० जवान जखमी झाले असून त्यांना जिल्हा रुग्णालयात उपचारासाठी दाखल करण्यात आले आहे. त्यातील एका जवानाची प्रकृती चिंताजनक असल्याचं सूत्रांनी सांगितले.
दरम्यान, रमजानच्या पवित्र महिन्यात हिंसा नको म्हणून भारतानं शस्त्रसंधीची घोषणा केली होती. मात्र या काळात अतिरेक्यांनी नेहमीपेक्षा सर्वाधिक हल्ले केल्याच दिसून आलं आहे. तर रमजानच्या शेवटच्या ५ दिवसात आणखी ५ मोठे दहशतवादी हल्ले होण्याची शक्यता यापूर्वीच वर्तवण्यात आली होती.
