कोरोनावर मात करणारी कोणतीही लस 50 टक्केही प्रभावी नाही; WHOचे स्पष्टिकरण
जगभरात कोरोनाचा खात्मा करणारी लस कधी याबाबत सर्वजण प्रतिक्षेत आहेत. या लशींची चाचण सध्या सुरु आहे. मात्र लशींची प्रतिक्षा केली जात असताना जागतिक आरोग्य संघटनेने धक्कादायक विधान केले आहे. सध्या चाचणी सुरू असलेली लस ५० टक्केही प्रभावी नसल्याचे म्हटले आहे. लस सुरक्षित नसल्यास त्याची शिफारसही करणार नसल्याचे संघटनेने स्पष्ट केले आहे.
कोरोनाच्या संसर्गाने जगभरात थैमान घातले आहे. कोरोनाला अटकाव करणाऱ्या लशीकडे सगळ्यांचे लक्ष लागले आहे. जगभरातील अनेक देशांमध्ये कोरोनाच्या संसर्गाला अटकाव करण्यासाठी प्रयत्न सुरू आहेत. काही लशींची चाचणी ही तिसऱ्या टप्पात पोहचली आहे. तर, रशियाने जगातील पहिली कोरोना प्रतिबंधक लस ‘स्पुटनिक व्ही’ विकसित केल्याचा दावा केला आहे. या दरम्यानच जागतिक आरोग्य संघटनेने लशींबाबत पुन्हा एकदा इशारा दिला आहे. सध्या चाचणी सुरू असलेल्या लशींपैकी एकही लस करोनावर ५० टक्केही प्रभावीही नसल्याचा दावा जागतिक आरोग्य संघटनेने केला आहे. त्याशिवाय, पुढील वर्षांपर्यंत २०२१ पर्यंत जगातील सर्वच नागरिकांना लस मिळेल याचीही शाश्वती नसल्याचे त्यांनी सांगितले.
जागतिक आरोग्य संघटनेच्या प्रवक्त्या मार्गारेट हॅरीस यांनी जिनिव्हामध्ये सांगितले की, जगभरात करोनाला अटकाव करणाऱ्या अनेक लशी चाचणीच्या महत्त्वाच्या टप्प्यावर आहेत. मात्र, कोणतीही लस पूर्णपणे प्रभावी आहे, असे म्हणता येणार नाही. जागतिक आरोग्य संघटनेचे निकष पूर्णपणे या लशी पूर्ण करत नाहीत. त्यामुळे या लशी प्रभावी आहेत असे म्हणता येणार नाही. पुढील वर्षाच्या पहिल्या सहा महिन्यातही व्यापक लशीकरण मोहीम सुरू होईल, असे वाटत नसल्याचे त्यांनी सांगितले. चाचणी होत असलेली लस करोनाविरोधात किती सुरक्षित आहे, यावर आम्ही लक्ष देत आहोत. त्यामुळे लस चाचणीच्या तिसऱ्या टप्प्याला अधिक वेळ लागत असल्याचे त्यांनी सांगितले.
करोनाला अटकाव करणारी लस सुरक्षित आणि प्रभावी असल्याशिवाय जागतिक आरोग्य संघटना या लशीच्या वापराची शिफारस करणार नसल्याचे जागतिक आरोग्य संघटनेने स्पष्ट केले आहे. चीन आणि रशियाने आपल्या देशात काही लशींच्या वापरास मंजुरी दिली आहे. या लशींचा वापरही सुरू करण्यात आला आहे. जागतिक आरोग्य संघटनेचे प्रमुख टेड्रोस घेब्रुयसुस यांनी सांगितले की, लशींचा वापर यशस्वीपणे अनेक दशकांपासून केला जात आहे. पोलिओ निर्मुलनात लशींचा वापर महत्त्वाचा ठरला आहे. जी लस सुरक्षित आणि प्रभावी नसेल त्या लशीची शिफारस करणार नाही असेही त्यांनी सांगितले.
जागतिक आरोग्य संघटनेचे आपात्कालीन प्रकरणांचे प्रमुख डॉक्टर मायकल रेयान यांनी याआधीच हर्ड इम्युनिटीची अपेक्षा करायला नको असे म्हटले होते. जागतिक लोकसंख्येचा विचार करता आपण अद्यापही विषाणूचा प्रसार रोखता येईल त्या स्थितीच्या जवळपासही नाही. त्यामुळे हर्ड इम्युनिटीची परिस्थिती अद्याप आली नसल्याचे त्यांनी याआधी सांगितले होते. हर्ड इम्युनिटी हा कोरोनावर मात करण्यासाठीचा पर्याय ठरू शकत नाही. आतापर्यंत करण्यात आलेल्या अभ्यासानुसार, सध्या फक्त १० ते २० टक्के लोकांमध्येच अॅण्टीबॉडीज आहेत, ज्या हर्ड इम्युनिटी निर्माण करण्यास मदत करू शकतील. मात्र, इतक्या कमी अॅण्टीबॉडीजने हर्ड इम्यूनिटीचे उद्दिष्ट साधता येणार नाही. असंही त्यांनी म्हटलं आहे.
