शस्त्रक्रिये दरम्यान डॉक्टरच्या निष्काळजीपणाचे एक प्रकरण समोर आले आहे. हैदराबादच्या निझाम इन्स्टिटयूट ऑफ मेडीकल सायन्स रुग्णालयात एका महिला रुग्णावर हर्णियाची शस्त्रक्रिया करण्यात आली. शस्त्रक्रिये दरम्यान वापरलेली कैची डॉक्टरांनी तशीच त्या महिलेच्या पोटात सोडून दिल्याचा धक्कादायक प्रकार समोर आला आहे. टाइम्स ऑफ इंडियाने हे वृत्त दिले आहे.
एक नोव्हेंबर रोजी महेश्वरी चौधरी (३३) यांच्यावर रुग्णालयात हर्णियाची शस्त्रक्रिया झाली. शस्त्रक्रियेनंतर त्यांना पोटदुखीचा प्रचंड त्रास सुरु झाला. १२ नोव्हेंबरला त्यांना रुग्णालयातून डिस्चार्ज मिळाला. पण ७ फेब्रुवारीला रात्री पोटात प्रचंड वेदना होत असल्याने त्या पुन्हा रुग्णालयात दाखल झाल्या. त्यावेळी एक्स रे रिपोर्टमध्ये त्यांच्या पोटात कैची आढळून आली.
ही कैची काढण्यासाठी या महिलेवर शस्त्रक्रिया करण्यात येणार आहे. या निष्काळजीपणाच्या चौकशीसाठी रुग्णालयाने समिती स्थापन केली आहे. हा प्रकार लक्षात आल्यानंतर रुग्णाच्या नातेवाईकांनी आरएमओकडे तक्रार नोंदवली. आपली चूक असल्याचे लक्षात आल्यानंतर रुग्णालय प्रशासन तो एक्स रे रिपोर्ट देत नव्हते पण आम्ही तो मिळवला असे रुग्णाच्या नातेवाईकाने सांगितले.
