शिवसेनेचे खासदारही शिंदे गटात सामील होतील का?; खासदार निंबाळकर म्हणाले की…
उस्मानाबाद : शिवसेनेचे नेते आणि नगरविकास मंत्री एकनाथ शिंदे यांनी बंडखोरी केल्यानंतर राज्यात खळबळ उडाली आहे. शिवसेनेच्या अनेक आमदारांनी एकनाश शिंदे यांना समर्थन दिले असून, शिवसेनेचे खासदार देखील एकनाथ शिंदे यांच्या गटात सामील होणार असल्याच्या चर्चा राजकीय वर्तुळात ऐकायला मिळत आहेत. मात्र, ही चर्चा म्हणजे निव्वळ अफवा असल्याचे उस्मानाबादचे शिवसेनेचे खासदार ओमराजे निंबाळकर यांनी सूचित केले आहे. सध्या उद्दभवलेल्या परस्थितीत आणि अशा संकट समयी शिवसेनेचा एक ही खासदार शिवसेनेला सोडून जाणार नाही, असे वक्तव्य खासदार निंबाळकर यांनी केले आहे. शिवसेनेचे खासदार एकनाथ शिंदे गटात सामिल होणार अशी चर्चा सर्वत्र असून त्या पार्श्वभूमीवर खासदार ओमराजे निंबाळकर यांनी हे वक्तव्य केल आहे.
उध्दव ठाकरेंनी माझ्या विरोधकाला म्हणजे राणा जगजीतसिंह पाटील यांना केवळ माझ्यामुळे शिवसेना पक्षात घेतले नाही. विधानसभा निवडणुकीवेळी उस्मानाबादची जागा शिवसेनेकडे होती. त्यावेळी राणा पाटील यांनी शिवसेनेच्या तिकिटावर लढवण्याची तयारी दाखवली. मात्र माझा संघर्ष त्यांनी बघितलेला असल्याने त्यांनी राणा पाटलांना तिकिट नाकारले, असा गौप्यस्फोट खासदार निंबाळकर यांनी केला.
मला उद्धव ठाकरे यांनी खूप प्रेम व सत्ता दिली. त्यामुळे अशा माणसाला संकट समयी सोडून जाणे कदापिही शक्य नाही असे सांगत त्यांनी त्यांची भूमिका स्पष्ट केली. माझ्या माहितीप्रमाणे शिवसेनेचा एकही खासदार पक्ष सोडून जाणार नाहीत, असेही ते म्हणाले. आपण शिवसेनेच्या सर्वच खासदारांच्या संपर्कात असतो. त्यामुळे शिवसेनाचा एकही खासदार एकनाथ शिंदे यांच्या गटात सामील होणार नाही, हे मला माहीत असल्याचे खासदार निंबाळकर यांनी ठामपणे सांगितले.