‘तू आधी माझ्याशी का बोलला नाहीस?’; राज ठाकरे-वसंत मोरे भेटीची ‘इनसाइड स्टोरी’

वसंत मोरे यांनी ‘शिवतीर्थ’वर प्रवेश करताच सर्वात आधी राज ठाकरे यांच्या पत्नी शर्मिला ठाकरे यांची भेट घेतली आणि त्यांच्यासमोर आपली भूमिका मांडली. मात्र तुमचे जे काही आक्षेप होते ते तुम्ही थेट राज ठाकरे यांच्याकडे का मांडले नाहीत? असा प्रश्न शर्मिला ठाकरे यांनी विचारल्याचं सूत्रांकडून सांगण्यात येत आहे. त्यानंतर वसंत मोरे आणि राज ठाकरे या दोघांमध्ये बैठक झाली. यावेळी राज यांनीही वसंत मोरे यांना तोच प्रश्न विचारत नाराजी व्यक्त केली. तुला थेट माझा अॅक्सेस असताना सर्वात आधी माझ्याशी का बोलला नाहीस? असं राज यांनी वसंत मोरेंना विचारलं. त्यानंतर या सर्व घडामोडींबाबत मोरे यांनी आपली बाजू मांडली.

‘गुढीपाडव्याच्या सभेनंतर मला अचानक कार्यकर्त्यांचे फोन येऊ लागले आणि रमजान सुरू असताना मशिदीसमोर हनुमान चालिसा लावली जाणार का, अशी विचारणा प्रभागातील कार्यकर्त्यांकडून व्हायला लागली. या सर्व घटनांमुळे मी भावुक झालो आणि पत्रकारांनी विचारणा केल्यानंतर त्यांच्यासमोर भूमिका मांडली,’ असं वसंत मोरे यांनी या भेट राज ठाकरेंना सांगितल्याचं समजते. दरम्यान, चर्चेअंती वसंत मोरे यांचे पक्षाच्या भूमिकेबाबत गैरसमज दूर झाले असल्याची माहिती आहे.

• ‘मी पक्षातच राहणार’
  
  राज ठाकरे यांच्यासोबत झालेल्या बैठकीनंतर मी पूर्णपणे समाधानी असून आगामी काळातही मनसेतच राहणार असल्याची माहिती वसंत मोरे यांनी पत्रकारांशी बोलताना दिली आहे. तसंच मला ज्या काही इतर पक्षांकडून ऑफर देण्यात आल्या होत्या, त्या आता संपल्या, असंही मोरे यांनी म्हटलं आहे.