आंध्र प्रदेशच्या तेलुगू भाषेत पूर्वापार रुजलेले अपशब्द उच्चारणे आता ‘बॅन’
अमरावती: आंध्र प्रदेशच्या तेलुगू भाषेत पूर्वापार रुजलेले अपशब्द उच्चारणे आता गुन्हा ठरणार आहे. जातिवाचक अपशब्द कायमचे हद्दपार करण्यासाठी राज्य सरकारने पावले उचलली असून, याचा वापर करणाऱ्यांविरोधात कायदेशीर कारवाई करण्याचा निर्णय जाहीर केला आहे.
‘मांगली’, मांगलिधी, मंगलोदा, बोच्चू गोरिगेवाडा और कोंडामांगली अशा शब्दांचा निषिद्ध यादीत समावेश करण्यात आला आहे. य़ा शब्दांमुळे नाई ब्राह्मण या नाभिक समाजाची अवहेलना होत असल्यानेच हा निर्णय घेण्यात आल्याचे राज्य सरकारने स्पष्ट केले आहे. हे सर्वच शब्द शिवराळ व अवमानजनक असल्याने कुणीही याचा वापर केल्यास तसेच याद्वारे कुणाच्याही भावना दुखावल्यास भारतीय दंड विधानाच्या १८६०नुसार कारवाई करण्यात येईल, असे राज्याच्या मागास जाती विकास विभागाने परिपत्रकाद्वारे स्पष्ट केले आहे.
आंध्र प्रदेशच्या नाई ब्राह्मण सहकारी वित्त महामंडळ, नवी दिल्लीतील नव समाज आणि राज्याच्या मागास जाती विकास विभागाच्या अहवालानंतर हा आदेश प्रसिद्ध करण्यात आला आहे. ‘या शब्दांच्या वापरामुळे नाई ब्राह्मण समाजातील नागरिकांना सार्वजनिक जीवनात अवहेलनेला सामोरे जावे लागत आहे. यामुळे अशा शब्दांचा वापर रोखण्यासाठी राज्य सरकारने सूचना प्रसारित कराव्यात, अशी शिफारस मागास जाती विभागाच्या संचालकांनी केली होती’, असे राज्य सरकारने प्रसिद्ध केलेल्या आदेशात म्हटले आहे.
