महिलेवर लैंगिक अत्याचार करून तिची ६६ लाख रुपयांची फसवणूक केल्याप्रकरणी दोघांना अटक
पिंपरी : देहू रोड पोलीस ठाण्याच्या हद्दीत एका महिलेचे लैंगिक शोषण करून जमीन खरेदी प्रकरणात ६६ लाखांची फसवणूक केल्याची घटना उघडकीस आली आहे. पोलिसांनी तीन जणांविरुद्ध एफआयआर नोंदवला असून त्यापैकी दोघांना अटक केली आहे. ही घटना 10 जुलै 2021 ते 6 जानेवारी 2022 दरम्यान घडली आहे.
याप्रकरणी प्रदीप फक्कड कोळी (वय 30, रा. तळेगाव दाभाडे), अंकुश सोनवणे, देवा विलास सोनवणे (वय 32, रा. पवनानगर, मावळ) यांच्याविरुद्ध देहू रोड पोलीस ठाण्यात गुन्हा दाखल करण्यात आला आहे. आयपीसी कलम ३७६, ४०६, ४२० आणि १२०बी अन्वये गुन्हा दाखल करण्यात आला आहे. याप्रकरणी ३३ वर्षीय पीडितेने गुरुवारी (२९ सप्टेंबर) फिर्याद दिली.
याप्रकरणी पोलिसांनी प्रदिप कोळी आणि देवा सोनवणे यांना अटक केली आहे.
पोलिसांनी दिलेल्या माहितीनुसार, आरोपी अंकुश सोनवणे आणि प्रदीप कोळी यांनी पीडितेला पवनानगर येथील जमीन चांगली असून, तिची एफडी तोडून या मालमत्तेत गुंतवणूक करावी, असे सांगितले. तसेच प्रदीप कोळी याने पीडितेला हा प्रकार कोणाला सांगितल्यास एक दिवस तिला व तिच्या मुलीला गायब करू, अशी धमकी दिली.
पीडित महिलेने एफडी तोडून जमिनीत गुंतवणूक केली. जानेवारीच्या शेवटच्या आठवड्यात 7/12 आला तेव्हा तक्रारदाराने दाखवलेली जमीन आणि 7/12 वरील जमीन वेगळी असल्याचे लक्षात आले.
याबाबत अंकुश सोनवणे यांना विचारणा केली असता त्यांनी माहित नसल्याचे सांगून हा सर्व प्रकार प्रदीप कोळी हाताळत असल्याचे सांगितले. यानंतर प्रदीप कोळी याने महिलेच्या घरी येऊन पीडित महिलेला लग्नाची मागणी घातली आणि फिर्यादीचे घर आपल्या नावावर करण्याची धमकी देऊन तिच्याशी जबरदस्तीने शारीरिक संबंध प्रस्थापित केले.
जमिनीच्या व्यवहाराच्या बहाण्याने आरोपीने महिलेची 66 लाख रुपये घेऊन फसवणूक केली. शारीरिक अत्याचार आणि आर्थिक फसवणुकीमुळे महिलेला मानसिक धक्का बसला होता. यातून सावरल्यानंतर तिने गुरुवारी (29 सप्टेंबर) फिर्याद दिली.
पोलिसांनी आरोपींविरुद्ध गुन्हा दाखल करून दोघांना अटक केली. पुढील तपास सहायक पोलीस निरीक्षक गावडे करीत आहेत.
