पुणे : राज्यात २०१९ च्या विधानसभा निवडणुकीनंतर घडलेल्या नाट्यमय घडामोडींची देशभरात मोठी चर्चा झाली होती. शिवसेनेनं भाजपला धक्का देत काँग्रेस आणि राष्ट्रवादीसोबत सत्ता स्थापन केली. या संपूर्ण सत्तानाट्याविषयी भाजप नेते आणि विधानसभेचे विरोधी पक्षनेते देवेंद्र फडणवीस यांनी मंगळवारी पुण्यातील एका कार्यक्रमात पुन्हा एकदा भाष्य केलं आहे. ‘खेळ असो वा राजकारण, त्यामध्ये माणसाने कधीही आत्मसंतुष्ट असू नये. २०१९ मध्ये सत्तेच्या खेळाचे आम्हीच ग्रँडमास्टर होतो, सत्तेचा डाव देखील मांडला होता. मात्र आम्ही समोरील खेळाडूची चाल समजू शकलो नाही,’ अशी स्पष्ट कबुली देवेंद्र फडणवीस यांनी दिली आहे.
महाराष्ट्र बुद्धिबळ संघटनेच्या वतीने आयोजित आणि अखिल भारतीय बुद्धिबळ संघटना यांच्या मान्यतेखाली होत असलेल्या पहिल्या महाराष्ट्र आंतरराष्ट्रीय ओपन ग्रँडमास्टर बुद्धिबळ स्पर्धेला श्रीशिवछत्रपती क्रीडानगरी, बालेवाडी येथे प्रारंभ झाला. स्पर्धेच्या उद्घाटन प्रसंगी देवेंद्र फडणवीस बोलत होते. यावेळी क्रीडा आयुक्त ओमप्रकाश बकोरिया, प्रसाद लाड, महाराष्ट्र बुद्धिबळ संघटनेचे अध्यक्ष डॉ. परिणय फुके, कार्याध्यक्ष सिद्धार्थ मयूर, वरिष्ठ उपाध्यक्ष ग्रॅन्डमास्टर अभिजीत कुंटे, उपाध्यक्ष अनिरुद्ध देशपांडे व गिरीश चितळे, महाराष्ट्र बुद्धिबळ संघटनेचे माजी अध्यक्ष व निमंत्रक अशोक जैन आणि मानद सचिव निरंजन गोडबोले आदी मान्यवर उपस्थित होते.
या स्पर्धेत भारतासह २४ देशांमधील १४० खेळाडूंनी सहभाग घेतला असून त्यात १७ ग्रँडमास्टर्स, महिला ग्रँडमास्टर्स आणि २९ आंतरराष्ट्रीय मास्टर्स खेळाडूंचा सहभाग आहे. या स्पर्धेत २ हजार पेक्षा जास्त एलो गुणांकन असलेल्या खेळाडूंचा सहभाग आहे.
कोणताही खेळ खळताना त्यातील खाचाखोचा नीट समजावून घ्या, असे सांगून देवेंद्र फडणवीस म्हणाले की, महाराष्ट्राने देशाला अनेक ग्रँडमास्टर दिले आहेत आणि आता युवा खेळाडू तोच वारसा पुढे चालवत आहेत. या स्पर्धेतील खेळाडूंचा भरघोस सहभाग पाहून मला खूपच आनंद होत आहे. फिडे नियमानुसार ही स्पर्धा होत असल्याने अनेकांना या स्पर्धेतून ग्रँडमास्टर किंवा आंतरराष्ट्रीय मास्टर नॉर्म मिळवण्याची संधी आहे. खिलाडू वृत्ती, खेळभावना आणि स्पर्धात्मकता हे गुण ज्याच्याकडे असतात, तो स्पर्धाही जिंकतो आणि खर्‍या आयुष्यातही यश मिळवतो.
बुद्धिबळ आणि राजकारणात आपल्याला समोरील खेळाडूच्या डोक्याचा आभ्यास करता येणे फार महत्त्वाचे असते. मी आणि देवेंद्र फडणवीस एकाच भागातील असल्याने अनेक खेळ आम्ही नागपूर महानगरपालिकेत देखील एकत्र खेळलो आहे, असं यावेळी सुनील केदार यांनी सांगितलं.
दरम्यान, खेलो इंडिया’ स्पर्धेसाठी महाराष्ट्र संघाचे सराव व प्रशिक्षण शिबीर चालू असल्याचे सांगून सुनील केदार म्हणाले की, या सगळ्याचा पुरेपूर फायदा खेळाडू निश्‍चितच करून घेतील. महाराष्ट्रात या वर्षअखेरपर्यंत अत्याधुनिक सुविधांनी युक्त असे क्रीडा विद्यापीठ सुरू होणार असल्याची माहितीही त्यांनी दिली.
देवेंद्र फडणवीस जेव्हा कपिल देवसोबत क्रिकेट खेळतात तेव्हा…
