पुणेकरांना दिलासा, सीएनजीच्या दरात कपात, एका किलोला किती रुपये द्यायचे? वाचा…
पुणे : पुणे व पिंपरी चिंचवड, चाकण तळेगाव आणि हिंजवडी परिसरातील सीएनजीच्या दरामध्ये मंगळवारी मध्यरात्रीपासून चार रूपयांनी कपात करण्याचा निर्णय महाराष्ट्र नॅचरल गॅस लिमिटेड (एमएनजीएल) ने घेतला आहे. त्यामुळे पुण्यात आता वाहन चालकांना एक किलो सीएनजीसाठी ८७ रूपये मोजावे लागणार आहेत. सीएनजीचे दर चार रूपयांनी कमी झाल्यामुळे वाहन चालकांना थोडासा दिलासा मिळाला आहे.
सीएनजी गॅसची मागणी वाढत आहे. पण, स्थानिक गॅसची कमतरता आणि आयात गॅस महाग झाल्यामुळे सीएनजीच्या दरात सतत वाढ होत होती. एक एप्रिल पासून सीएनजीच्या दरात वाढच होत आहे. काही दिवसांपूर्वीच सहा रूपयांनी सीएनजीचे दर वाढले होते. त्यामुळे सीएनजी ९१ रूपयांवर गेला होता. पण, आता एमएनजीएलने सीएनजीच्या दरात चार रूपयांनी कपात करण्याचा निर्णय घेतला आहे. त्यामुळे वाहन चालकांना आता एका किलोसाठी ८७ रूपये द्यावे लागणार आहेत.
सीएनजीचे दर कमी झाल्यामुळे वाहन चालकांना थोडासा दिलासा मिळाला आहे. वाहन चालकांकडून सीएनजीचे दर आणखी कमी करण्याची मागणी केली जात आहे.
मुंबईतही सीएनजीच्या दरात कपात
महानगर गॅस लिमिटेडने सीएनजीच्या दरात सहा रुपये प्रति किलो तर पीएनजीच्या दरात ४ रुपये प्रति एससीएम (घन मीटर) कपात केली आहे नव्या दरांनुसार, मुंबईत सीएनजी ८० रुपये तर घरोघरी स्वयंपाकासाठी वापरला जाणारा पीएनजी (पाइप नॅचरल गॅस) ४८.५० रुपये प्रति किलो उपलब्ध होईल. हे दर १७ ऑगस्टपासून लागू होतील. सध्याचे हे दर पेट्रोलच्या तुलनेत ४८टक्के स्वस्त असल्याचा दावा कंपनीने केला आहे. तर, पीएनजी हा एलपीजीच्या तुलनेत १८ टक्के स्वस्त असल्याचा दावा देखील कंपनीनं केला आहे.