पुणे-मुंबई रेल्वे सेवा सुरू करण्यासंदर्भात रेल्वे प्रशासनाकडून हालचाली सुरू
कोरोनाच्या पार्श्वभूमीवर गेले सहा महिने बंद असलेली पुणे-मुंबई रेल्वे सेवा सुरू करण्यासंदर्भात रेल्वे प्रशासनाकडून हालचाली सुरू झाल्या आहेत. प्रगती, इंटरसिटी, सिंहगड, महालक्ष्मी एक्स्प्रेससह अनेक गाड्या सुरू करण्याचे रेल्वेने प्रस्तावित केले आहे. मात्र, ही सेवा कधीपासून सुरू होणार हे निश्चित नाही.
राज्य सरकारने नुकतीच अनलॉक चारची नियमावली जाहीर केली आहे. त्यामध्ये पुण्यातील लोकल सेवा सुरू करण्यास हिरवा कंदील दाखवला आहे, तर राज्याअंतर्गत रेल्वेसेवा सुरू करण्याबाबतही परवानगी दिली आहे. त्यामुळे पुणे-मुंबई मार्गावरील सेवा सुरू करण्याचा मार्ग मोकळा झाला आहे. मात्र, ही सेवा सुरू करण्याचा निर्णय रेल्वे बोर्डाकडून घेतला जाणार आहे, असे रेल्वेच्या अधिकाऱ्यांनी सांगितले आहे.
दरम्यान, या पार्श्वभूमीवर मध्ये रेल्वेच्या मुंबई येथील मुख्य वाणिज्य व्यवस्थापक कार्यालयाचे पत्र सोशल मीडियावर व्हायरल झाले असून, त्यामध्ये १९ गाड्यांद्वारे राज्याअंतर्गत प्रवासी वाहतूक करण्याचे प्रस्तावित असल्याचे म्हटले आहे.
त्या पत्रात नमूद केल्यानुसार, डेक्कन एक्स्प्रेस, प्रगती एक्स्प्रेस, इंटरसिटी एक्स्प्रेस, सिंहगड एक्स्प्रेस, महालक्ष्मी एक्स्प्रेस, महाराष्ट्र एक्स्प्रेस, सिद्धेश्वर एक्स्प्रेस, हुतात्मा एक्स्प्रेस, पुणे नागपूर गरीब रथ आणि पुणे-भुसावळ एक्स्प्रेस या गाड्या प्रस्तावित आहेत. मात्र, या गाड्या केव्हा सुरू होणार, तसेच या पत्राबाबत रेल्वेच्या पुण्यातील अधिकाऱ्यांनी दुजोरा दिलेला नाही.
