‘भगतसिंह कोश्यारी महाराष्ट्राचे गुन्हेगार आहेत’; संजय राऊत यांचा हल्लाबोल
मुंबई : माजी राज्यपाल भगतसिंह कोश्यारी यांनी काल मुख्यमंत्री एकनाथ शिंदे यांची त्यांच्या शासकीय निवासस्थांनी भेट घेतली. या भेटीत दोघांमध्ये काय चर्चा झाली ते समोर येऊ शकलेलं नाही. दरम्यान, यावरून शिवसेना ठाकरे गटाचे खासदार संजय राऊत यांनी एकनाथ शिंदे आणि भगतसिंह कोश्यारी यांच्यावर हल्लोबल केला आहे.
संजय राऊत म्हणाले की, महाराष्ट्राचे माजी राज्यपाल भगसिंह कोश्यारी हे महाराष्ट्राचे गुन्हेगार आहेत. महाराष्ट्राचा मोठा अपराध तेव्हा राज्यपाल असलेल्या कोश्यारींनी केला आहे. हा अपराध किती मोठा आहे. सर्वोच्च न्यायालयाने सांगितलं आहे. महाराष्ट्राच्या गुन्हेगाराला जर मुख्यमंत्री भेटत असतील तर ती त्यांची प्रवृत्ती आहे. महाराष्ट्र सगळं पाहतो आहे. घटनाबाह्य पद्धतीने काम करून एक सरकार त्यांनी आणलं. त्यामुळे आपण बसवलेल्या घटनाबाह्य मुख्यमंत्र्याला माजी राज्यपाल भेटायला गेले असतील तर ते दोन घटनाबाह्य व्यक्ती बघून घेतील. आम्ही त्याकडे गंभीर्याने पाहात नाही. भगतसिंह कोश्यारींना त्यांच्या कृत्याची फळं लवकरच मिळतील आणि कायदेशीर मार्गाने मिळतील.
हेही वाचा – Pune : पुणे लोकसभा पोटनिवडणूक लवकरच, १२ हजार ६०० ईव्हीएम मशिन उपलब्ध
भगतसिंह कोश्यारी यांनी बाळासाहेब ठाकरेंची शिवसेना तोडण्यासाठी घटनेचा गैरवापर केला हे महाराष्ट्राने पाहिलं. उद्धव ठाकरेंना मुख्यमंत्रीपदावरून घालवण्यासाठी कोश्यारींनी कायद्याचा आणि घटनेचा गैरवापर केला हे सर्वोच्च न्यायालयाने सांगितलं आहे. अशा माजी राज्यपालाला वर्षा बंगल्यावर बोलवून घटनाबाह्य मुख्यमंत्री मिठी मारत असतील तर तो त्यांचा प्रश्न आहे, असंही संजय राऊत म्हणाले.
