पिंपरी-चिंचवडची तहान भागवणाऱ्या पवना धरणात ४७ टक्के पाणीसाठा शिल्लक

एप्रिल महिना सुरू झाला असून शहरामध्ये उन्हाचे तीव्र चटके जाणवू लागले आहेत. त्यामुळे पाण्याचा वापर वाढला असून सद्यस्थितीत नागिरकांना पाण्याची टंचाई जाणवत आहे. शहरासाठी पवना धरणातून ४८० एमएलडी पाणीपुरवठा केला जातो. रावेत येथील बंधाऱ्यातून ते पाणी उचलून शुद्ध करून शहराला पुरवले जाते. तर एमआयडीसीकडून ३० एमएलडी शुद्ध पाणी घेतले जाते. असे दररोज ५१० एमएलडी पाणी शहराला पुरवले जाते. शहराची वाढती लोकसंख्या आणि विस्तार पाहता शहरासाठी आंद्रा व भामा आसखेड येथून पाणीपुरवठा करण्याचा प्रकल्प हाती घेण्यात आला आहे. मात्र या प्रकल्पांचे काम कासवगतीने सुरू आहे. त्यामुळे शहरातील नागरिकांना सद्यस्थितीत मिळणाऱ्या ५१० एमएलडी पाण्यावरच अवलंबून राहावे लागणार आहे.