पिंपरी-चिंचवड महापालिका निवडणूक : पहिल्या चार तासांत १६.०३ टक्के मतदान
पिंपरी-चिंचवड | पिंपरी-चिंचवड महापालिका निवडणुकीसाठी आज सकाळी साडेसात वाजता मतदान प्रक्रियेला सुरुवात झाली. निवडणुकीच्या पहिल्या चार तासांत ११.३० वाजेपर्यंत शहरात एकूण १६.०३ टक्के मतदान झाल्याची माहिती निवडणूक प्रशासनाकडून देण्यात आली आहे.
प्रशासनाकडून मिळालेल्या माहितीनुसार, एकूण २ लाख ७४ हजार ६६४ मतदारांनी आपला मतदानाचा हक्क बजावला आहे. यामध्ये १ लाख ६२ हजार १२५ पुरुष, १ लाख १२ हजार ५३६ महिला आणि ३ इतर मतदारांचा समावेश आहे.
हेही वाचा : पिंपरीत आमदार अमित गोरखे यांनी केले सहपरिवार मतदान; युवक, महिला व ज्येष्ठांना मतदानाचे आवाहन
पिंपरी-चिंचवड महापालिका क्षेत्रातील एकूण मतदार संख्या १७ लाख १३ हजार ८९१ इतकी असून त्यामध्ये ९ लाख ५ हजार ७२८ पुरुष, ८ लाख ७ हजार ९६६ महिला आणि १९७ इतर मतदारांचा समावेश आहे.
दरम्यान, शहरातील अनेक मतदान केंद्रांवर काही काळासाठी मतदान यंत्रे (ईव्हीएम) बंद पडल्याच्या घटना घडल्या. त्यामुळे काही ठिकाणी मतदारांना प्रतीक्षा करावी लागली. मात्र, निवडणूक प्रशासनाने तात्काळ उपाययोजना करत मतदान प्रक्रिया सुरळीत सुरू ठेवण्याचे प्रयत्न केले.
