थकबाकीदारांच्या मालमत्ता जप्तीच्या कारवाईस वेग

पिंपरी : आर्थिक वर्ष संपण्यास अवघे दोन दिवस बाकी असून पिंपरी चिंचवड महानगरपालिकेने मालमत्ताधारकांना तात्काळ कर भरण्याचे आवाहन केले आहे. त्यासोबतच थकबाकीदारांवर मालमत्ता जप्तीची कारवाईस वेग आला असून ज्या मालमत्ताधारकांनी मालमत्ता कर भरला नाही अशा मालमत्तांचे नळकनेक्शन खंडित करण्यात येत आहे.

कर संकलन विभागाने आत्तापर्यंत तब्बल १०६९ हून अधिक मालमत्तांवर मालमत्ता जप्तीची कारवाई व जवळपास १०२० मालमत्तांचे नळकनेक्शन खंडित करण्यात आले आहे. त्याबरोबरच ४३४ मालमत्ता लिलावाच्या उंबरठ्यावर असून या मालमत्तांचा तात्काळ लिलाव सुद्धा करण्यात येणार आहे. त्यामुळे थकबाकीदारांनी ३१ पूर्वीच आपल्या थकीत कराचा भरणा करून कटू कारवाई टाळावी. असे आवाहन करसंकलन विभागाकडून करण्यात आले आहे.

हेही वाचा –  ‘गुढीपाडव्याच्या निमित्ताने शाश्वत विकासाचा संकल्प’; आमदार महेश लांडगे

कॅश काउंटर्स रात्री १२ पर्यंत खुली राहणार

नागरिकांच्या सोयीसाठी करसंकलन विभागाने शहरातील १८ विभागीय करसंकलन कार्यालये व कॅश काउंटर्स खुली ठेवण्याचा निर्णय घेतलेला आहे. सकाळी ९.४५ ते रात्री १२ पर्यंत कॅश काउंटर्स खुली असून नागरिकांनी आपला कर भरण्यासाठी पुढाकार घ्यावा. असे आवाहन सहाय्यक आयुक्त अविनाश शिंदे यांनी केले आहे.

महाईन्यूज-X वर फॉलो करा : महाईन्यूजला instagram वर फॉलो करा

“शहरातील थकबाकीदारांना वारंवार आवाहन करूनही ज्या थकबाकीदारांनी अद्यापही थकीत कराचा भरणा केला नाही अशा मालमत्ता कोणत्याही क्षणी जप्त करण्याच्या सूचना देण्यात आल्या असून आत्तापर्यंत १०६९ मालमत्तांवर जप्तीची कारवाई करण्यात आली असून जवळपास १०२० मालमत्तांचे नळकनेक्शन खंडित करण्यात आले आहे.

– प्रदीप जांभळे पाटील, अतिरिक्त आयुक्त (1), पिंपरी चिंचवड महानगरपालिका