६५१ सोसायट्या , ३६ हजार मालमत्ताधारक ; ६९ कोटी ५६ लाखांचा कर थकीत
करसंकलन विभागाकडून थकित कर भरणा होण्यासाठी प्रयत्न
पिंपरी : पिंपरी-चिंचवड महानगरपालिकेच्या कर आकारणी व कर संकलन विभागामार्फत आकारणी न झालेल्या मालमत्तांचे नोंदणी व करआकारणी कार्यवाही करण्यासाठी आता सोसायटीनिहाय कर वसुलीची मोहीम हाती घेण्यात आली आहे. त्यानुसार ६५१ सोसायटीमधील ३६ हजार ९८० मालमत्ताधारकांचा ६९ कोटी ५६ लाखांचा कर थकीत आहे.सोसायटीतील थकबाकीदारांची नावे आता सोसायटीच्या अध्यक्षांकडेच पाठवली जाणार आहे.
पिंपरी चिंचवड महापालिकेच्या कर विभागाने शहरातील नव्या मालमत्तांचा शोध घेऊन तसेच थकबाकीदार शोधण्यासाठी मे. स्थापत्य कन्सल्टंट प्रा.लि या खासगी कंपनीची नेमणूक करून त्यांच्यामार्फत शहरातील मालमत्तांचे सर्वकष सर्वेक्षण सुरू आहे.
मालमत्तांच्या सर्वकष सर्वेक्षणामध्ये ६४ हजार २६० मालमत्तांची नव्याने आकारणी करण्यात आली .त्या मालमत्तांना मालमत्ताकराचे बिलसुध्दा बजाविणेत आले.
मालमत्ता सर्वेक्षणामध्ये नव्याने आकारणी झालेल्या मालमत्तांमध्ये ६९० सोसायट्यांमधील ५६ हजार २३२ मालमत्तांना मालमत्ताकराचे बिल बजाविणेत आले असून यामधून ६५१ सोसायटीमधील ३६ हजार ९८० मालमत्ताधारकांचा ६९ कोटी ५६ लाखांचा कर थकीत आहे. थकबाकी असणाऱ्या मालमत्ताधारकांना एसएमएस, टेलिकॉलिंग यामाध्यमातून कराचा भरणा करण्याचे आवाहन वारंवार करसंकलन विभागाकडून करण्यात येत आहे.
शहरातील थकबाकी असणाऱ्या ६५१ सोसायटींचे अध्यक्ष तथा चेअरमन यांना त्यांच्या सोसायटीमधील थकबाकी असणाऱ्या मालमतांधारकांची संपूर्ण माहिती ,थकीत मालमत्ताधारकाचे नाव, थकीत रक्कम इ. करसंकलन विभागाकडून पाठविण्यात येणार असून, थकबाकी असणाऱ्या मालमत्ताधारकांची यादी सोसायटीच्या नोटीस बोर्ड, सोसायटी व्हाट्सअप ग्रुपमध्ये पाठवून, तसेच ज्यांची कराची थकीत रक्कम आहे ; अशा सोसायटीच्या सभासदांना कराचा भरणा करण्यासाठी त्यांनी आवाहन करावे असे करसंकलन विभागाकडून सोसायटी अध्यक्षांना कळविण्यात आले आहे.
” नव्याने आकारणी झालेल्या सोसायट्यामधील मालमत्ताधारकांना कराचा भरणा करण्यासाठी वारंवार विविध माध्यमातून आवाहन करण्यात येत आहे. परंतू अद्यापही कराचा भरणा न केलेल्या सोसायट्यांमधील मालमत्तांची यादी संबंधित सोसायटी अध्यक्षांना पाठविण्यात येणार असून, सोसायटी अध्यक्षांनी सोसायटीमधील थकबाकी असणाऱ्या मालमत्ताधारकांना तात्काळ कराचा भरणा करण्याचे आवाहन करुन सहकार्य करावे.”
प्रदीप जांभळे पाटील
अतिरिक्त आयुक्त
