पिंपरी-चिंचवड महापालिका निवडणूक : आपच्या प्रचाराचा नारळ फुटला
पिंपरी l प्रतिनिधी
आगामी महापालिका निवडणुकीच्या पार्श्वभूमीवर आम आदमी पार्टी (आप)ने प्रचाराला सुरुवात केली आहे. शनिवारी (दि. 5) भोसरी आणि कासारवाडी येथे आपच्या जनसंपर्क कार्यालयाचे उदघाटन झाले. यावेळी पक्षाने महापालिका निवडणुकांच्या प्रचाराचा देखील नारळ फोडला.
आपचे भोसरी विधानसभा उपाध्यक्ष मंगेश आंबेकर यांच्या आणि कासारवाडी विभाग अध्यक्ष मोतीराम अगरवाल याच्या जनसंपर्क कार्यालयाचे उदघाटन आपचे राज्य संघटक विजय कुंभार याच्या हस्ते करण्यात आले. यावेळी आपचे पुणे जिल्हाध्यक्ष मुकुंद किर्दत आणि पिंपरी चिंचवड शहर कार्याध्यक्ष चेतन बेंद्रे प्रमुख पाहुणे म्हणून उपस्थित होते.
निवडणूक आयोगाने पिंपरी चिंचवड महापालिका निवडणूक 2022 साठी प्रभाग रचना जाहीर केल्याबरोबर सर्वच पक्षांनी निवडणुकीची तयारी सुरू केली आहे. आम आदमी पार्टीनेही यामध्ये आघाडी घेत ५ फेब्रुवारी रोजी काळभोरनगर येथील हनुमान पुतळा येथे प्रचाराचा नारळ फोडला. यानंतर सायंकाळी भोसरी गावठाण येथे जनसंपर्क कार्यालयाचे उदघाटन करण्यात आले.
उदघाटन प्रसंगी बोलताना विजय कुंभार म्हणाले, “आम जनतेचे कल्याण होण्यासाठी नगरसेवक हे आम आदमीच असले पाहिजेत. यासाठीच आप ‘आपणच होऊ नगरसेवक’ ही घोषणा घेऊन महापालिका निवडणुकीत उतरत आहे.” “आपने दिल्ली मधील शैक्षणिक आणि आरोग्य क्षेत्रात घडवलेल्या क्रांतिकारी सुधारणांचा आढावा घेण्यासाठी महापालिका नगसेवकांनी दिल्ली दौरा केला. परंतु महापालिकेच्या शिक्षण आणि आरोग्य बजेटचे तीन तेरा वाजवले आहेत. म्हणूनच पिंपरी चिंचवडला शिक्षण आणि आरोग्य सुविधा सुधारण्यासाठी आम आदमी पार्टीच्या दिल्ली मॉडेलची गरज असल्याचे कार्याध्यक्ष चेतन बेंद्रे यांनी सांगितले.
यावेळी जिल्हाध्यक्ष मुकुंद किर्दत यांच्या हस्ते नवीन कार्यकर्त्यांचे पक्ष प्रवेश करण्यात आले. तन-मन-धनाने आपचा प्रसार आणि प्रचार करणारे कार्यकर्ते हेच आम आदमी पार्टीची खरी ताकद असल्याचे किर्दत यांनी यावेळी नमूद केले. या कार्यक्रमाला आम आदमी पार्टीचे शहरातील सर्व पदाधिकारी व कार्यकर्ते उपस्थित होते. प्रचारप्रमुख राज चाकणे यांनी कार्यक्रमाचे सूत्रसंचालन केले.