राष्ट्रवादीचे सर्वेसर्वा शरद पवार यांच्या पत्नी प्रतिभा पवार यांच्यावर मुंबईतील ब्रीच कँडी रुग्णालयात शस्त्रक्रिया
मुंबई: राष्ट्रवादी काँग्रेसचे अध्यक्ष शरद पवार यांच्या पत्नी प्रतिभा पवार यांना मुंबईतील ब्रीच कँडी रुग्णालयात शुक्रवारी दाखल करण्यात आले आहे. याबाबतचे वृत्त एएनआय वृत्तसंस्थेने दिले आहे. प्रतिभा पवार यांच्यावर शस्त्रक्रिया झाली असून शरद पवार देखील रुग्णालयात उपस्थित होते. प्रतिभा पवार यांच्यावर नेमकी कोणती शस्त्रक्रिया होणार आहे हे समजू शकले नाही.
प्रतिभा पवार यांच्यावर शस्त्रक्रिया झाल्यानंतर त्यांना घरी सोडण्यात आले आहे. दरम्यान, शस्त्रक्रियेनंतर राज्याचे उपमुख्यमंत्री अजित पवार यांनी सिल्व्हर ओक येथील शरद पवारांच्या घरी जाऊन प्रतिभा पवार यांची भेट घेतली. अजित पवार यांनी राष्ट्रवादी काँग्रेसमधून बंड केल्यानंतर आणि उपमुख्यमंत्रीपदाची शपथ घेतल्यानंतर ते प्रथमच पवारांच्या निवासस्थानी गेले होते.
अजित पवार अचानक सिल्व्हर ओकवर पोहोचल्याने ही भेट नेमकी कशासाठी अशी चर्चा सुरू झाली होती. मात्र राष्ट्रवादी काँग्रेसमधील अजित पवाराच्या गटात असलेल्या सुनिल तटकरे, अमोल मिटकरी यांनी ही भेट कौटुंबिक असल्याने त्याचा वेगळा अर्थ काढला जाऊ नये असे म्हटले.