मध्य रेल्वे मार्गावर २७ एप्रिल रोजी तर पश्चिम रेल्वेचा २६ ते २८ एप्रिल दरम्यान मेगा ब्लॉक
मुंबईतील लोकल सेवा मेगाब्लॉकमुळे विस्कळीत होणार आहे. लोकल ट्रेनच्या अनेक फेऱ्या रद्द
मुंबई : मुंबईकरांसाठी आगामी दोन-तीन दिवस अडचणीचे ठरणार आहे. मुंबईतील लोकल सेवा मेगाब्लॉकमुळे विस्कळीत होणार आहे. लोकल ट्रेनच्या अनेक फेऱ्या रद्द केल्या आहे. मध्य रेल्वे मार्गावर २७ एप्रिल रोजी तर पश्चिम रेल्वेचा २६ ते २८ एप्रिल दरम्यान मेगा ब्लॉक असणार आहे. पश्चिम रेल्वेने १६३ लोकल फेऱ्या रद्द केल्या आहे.
हेही वाचा – पीएमआरडीएचा डीपी का रद्द केला? अजित पवार म्हणाले, बिल्डरांना…
मध्य अन् हार्बर मार्गावर मेगा ब्लॉक
मध्य रेल्वेच्या विद्याविहार ते ठाणे दरम्यान पाचव्या आणि सहाव्या मार्गावर तसेच हार्बर मार्गावरही उद्या मेगाब्लॉक घेण्यात येणार आहे. विविध अभियांत्रिकी आणि देखभालीची कामे करण्यासाठी उपनगरीय विभागांवर मेगाब्लॉक घेण्यात येणार आहे.
ब्लॉक कालावधीत हार्बर मार्गावरील प्रवाशांना सकाळी १० ते संध्याकाळी ६ वाजेपर्यंत मुख्य मार्ग आणि पश्चिम रेल्वेने प्रवास करण्याची परवानगी आहे. मुख्य मार्गावर विद्याविहार आणि ठाणे दरम्यान ५व्या, ६व्या मार्गावर सकाळी ८ वाजल्यापासून ते दुपारी १२.३० वाजेपर्यंत मेगाब्लॉक घेण्यात येणार आहे. या ब्लॉक कालावधीत डाऊन मेल / एक्स्प्रेस विद्याविहार स्थानकात येथे डाऊन जलद मार्गावर वळविल्या जातील आणि ठाणे स्थानकात पाचव्या मार्गावर पुन्हा वळवल्या जातील. अप मेल-एक्स्प्रेस ठाणे स्थानकात अप जलदमार्गावर वळविल्या जातील. तसेच विद्याविहारजवळ सहाव्या मार्गावर पुन्हा वळविल्या जातील.
हार्बर मार्गावर छत्रपती शिवाजी महाराज टर्मिनस (सीएसएमटी) आणि चुनाभट्टी-वांद्रे स्थानकादरम्यान अप मार्गावर रविवारी सकाळी ११ वाजल्यापासून ते ४.१० वाजेपर्यंत आणि डाऊन हार्बर मार्गावर ११.४० वाजल्यापासून ते ४.४० वाजेपर्यंत ब्लॉक घेण्यात येणार आहे.
पश्चिम रेल्वेच्या अनेक फेऱ्या रद्द
पश्चिम रेल्वेने २६ ते २८ एप्रिल दरम्यान मेगाब्लॉक घेतला आहे. कांदिवली आणि बोरिवली स्थानकांदरम्यान ३५ तासांचा मोठा ब्लॉक असणार आहे. २६ एप्रिल रोजी दुपारी १ वाजल्यापासून २८ एप्रिल मध्यरात्रीपर्यंत एकूण ३५ तासांचा मेगा ब्लॉक असणार आहे. कांदिवली आणि बोरिवली स्थानकांदरम्यान पुल क्रमांक ६१ वर पुन्हा गर्डरिंगच्या काम करण्यात येणार आहे. यामुळे मोठा मेगाब्लॉक घेतला आहे. मेगाब्लॉकमुळे लोकल आणि मेल, एक्स्प्रेस ट्रेन सेवेवर परिणाम होणार आहे. २६ एप्रिल रोजी ७३ आणि २७ एप्रिल रोजी ९० लोकल सेवा रद्द केल्या आहे.
महाईन्यूज-X वर फॉलो करा : महाईन्यूजला instagram वर फॉलो करा
