मिटकरींचं वक्तव्य, अजित पवारांची ‘दादा स्टाईल’ कमेंट, ‘किती वेळा सांगितलं, बोलताना जरा…’
पुणे |
राष्ट्रवादीचे विधान परिषदेचे आमदार अमोल मिटकरी यांच्या इस्मामपुरातील सभेने राज्याचं राजकीय वातावरण चांगलंच तापलं आहे. त्यांच्या घणाघाती भाषणावर राजकीय नेते विविध प्रतिक्रिया देत आहेत. भाजपने तर गेली दोन दिवस मिटकरींवर हवं तेवढं तोंडसुख घेतलं आहे. त्यांच्या भाषणाने ब्राह्मण समाजाच्या भावना दुखावल्याचा आरोप होत आहे. मिटकरींच्या याच भाषणावर राज्याचे उपमुख्यमंत्री अजित पवार यांना प्रतिक्रिया विचारली असती त्यांनी खास त्यांच्या स्टाईलने कमेंट केली.
‘किती वेळा सांगितलं, बोलताना जरा…’
“तुम्ही नेहमी मला असले प्रश्न विचारता की त्याने असं वक्तव्य केलं, त्याबद्दल तुमचं काय मत आहे. मी वारंवार सांगत असतो की कोणत्याही राजकीय पक्षाच्या नेत्याने बोलताना तारतम्य ठेऊन बोललं पाहिजे. आपल्या बोलण्यातून कुठल्या समाजाबद्दल, घटकाबद्दल अवमान होणार नाही याची काळजी घ्यायला हवी, कोणत्या समाजाची नाराजी वाढणार नाही, याकडे लक्ष द्यायला हवं, असं म्हणत अजित पवार यांनी एकप्रकारे मिटकरींच्या भाषणावर नाराजी व्यक्त केली.
मिटकरी माफी मागा, ब्राह्मण महासंघाचं आंदोलन, राष्ट्रवादीचं तोडीस तोड प्रत्युत्तर
अमोल मिटकरी यांच्या भाषानंतर राष्ट्रवादी आणि अखिल ब्राह्मण महासंघ आमनेसामने उभे ठाकले आहेत. मिटकरींनी माफी मागितलीच पाहिजे, अशी मागणी करत गुरुवारी पुण्यात ब्राह्मण महासंघाने आंदोलन केलं. तर राष्ट्रवादीनेही ब्राह्मण महासंघाला तोडीस तोड प्रत्युत्तर दिलं.
दुसरीकडे मी माझ्या भाषणात कोणत्याही समाजाचं नाव घेतलं नाही, कोणत्याही समाजाचा उल्लेख केला नाही, त्यामुळे मी माफी मागणार नाही, असा ठाम पवित्रा अमोल मिटकरी यांनी घेतला. तसंच शिवाजीराजांची बदनामी केली, सावित्रीबाईंची बदनामी केली, त्यावेळी यांनी संबंधितांकडे माफीची मागणी का केली नाही, असा उलट सवालही मिटकरींनी विचारला.
अमोल मिटकरी नेमकं काय म्हणाले होते?
इस्लामपूरच्या सभेत हनुमान चालिसा मुद्द्यावर बोलताना अमोल मिटकरी मध्येच काही मंत्र म्हणाले. विधी करणारे ब्राह्मण (गुरुजी) सांगतात त्याप्रमाणे त्यांनी डोळ्याला पाणी लावा, असं विशिष्ट स्टाईलमध्ये सांगितलं. मिटकरींच्या हुबेहूब मिमिक्रीने मंचावर बसलेले राष्ट्रवादी काँग्रेसचे प्रदेशाध्यक्ष जयंत पाटील आणि धनंजय मुंडे पोट धरुन हसायला लागले.
