मुंबई : करोनाच्या निर्बंधानंतर राज्यात यंदा मोकळीक मिळाल्याने आज मुंबईसह राज्यभर दहीहंडी उत्सव मोठ्या उत्साहात साजरा करण्यात आला. यंदाच्या दहीहंडी उत्सवात सेने तारे-तारकांनीही भाग घेतल्याने यंदाचा उत्सव मोठ्या जल्लोषात साजरा करण्यात आला. यंदाच्या दहीहंडीच्या उत्सवावर विरजन पडेल अशा कोणत्याही दुर्घटना आतापर्यंत घडल्या नसल्याने आज गोविंदांचा दिवस मोठ्या आनंदात गेला. मुंबईत दिवसभरात विविध ठिकाणी दहीहंडी उत्सवादरम्यान किरकोळ अपघात मात्र घडले. यात आतापर्यंत ७८ गोविंदा जखमी झाले आहेत. यांपैकी ६७ गोविंदांवर प्राथमिक उपचार करून त्यांना घरी सोडण्यात आले आहे. तर एकूण ११ गोविंदांना रुग्णालयात दाखल करण्यात आले आहे.
जांबोरी मैदानात गोविंदा पडून बेशुद्ध
जांबोरी मैदानात थर लावत असताना तिसऱ्या थरावरुन पडून एक गोविंदा बेशुद्ध झाला. त्याला तातडीने केईएम रुग्णालयात दाखल करण्यात आले. करण सावंत ( वय २२ वर्षे) असे या गोविंदाचे नाव आहे. जंबोरी मैदानात भाजपने ही दही हंडी आयोजित केली होती.
ठाण्यात ३५ गोविंदा जखमी
जखमी गोविंदांवर झाले उपचार
केईएम रुग्णालय – १७
जीटी रुग्णालय – ११
राजावाडी रुग्णालय – १०
नायर रुग्णालय – ९
सायन रुग्णालय – ७
कूपर रुग्णालय – ६
व्ही. एन. देसाई रुग्णालय -६
पोद्दार रुग्णालय -४
सेंट जॉर्ज रुग्णालय – ३
जेजे रुग्णालय – २
ट्रॉमा केअर रुग्णालय – २
डॉ. बाबासाहेब आंबेडकर रुग्णालय, कांदिवली – १
ठाण्यात ३५ गोविंदा जखमी
ठाण्यातही दिवसभरात विविध ठिकाणी दहीहंडी उत्सवादरम्यान किरकोळ अपघात मात्र घडले असन यात आतापर्यंत ३५ गोविंदा जखमी झाले आहेत. यांपैकी २९ गोविंदांवर प्राथमिक उपचार करून त्यांना घरी सोडण्यात आले आहे. तर एकूण ६ गोविंदांना रुग्णालयात दाखल करण्यात आले आहे.
ठाणे जिल्हा सामान्य रुग्णालयामध्ये पायाला दुखापत झालेल्या ३८ वर्षीय सूरज पारकर या गोविंदावर उपचार करण्यात आले. तर छत्रपती शिवाजी महाराज रुग्णालयात कळवा येथील वाघोबा नगर येथे राहणारा नितीन चव्हाण (१६) याच्यावर उपचार करण्यात आले.कोपरीतील गांधीनगर येथील शैलेश पाठक (३२) आणि शितलू तिवारी (२५) या दोघांच्या उजव्या हाताला दुखापत झाली. तर साहिल जोगळे (१५) याच्या डाव्या हाताला दुखापत झाली. या सर्वांवर उपचार करून घरी सोडण्यात आले. या सर्व जखमींची नोंद जिल्हा सामान्य रुग्णालयासह छत्रपती शिवाजी महाराज रुग्णालयात करण्यात आली आहे.
