मुंबई | महाराष्ट्र गृहनिर्माण व क्षेत्रविकास प्राधिकरणाचा (म्हाडा) २०२२-२३ आर्थिक वर्षाचा अर्थसंकल्प नुकताच म्हाडा प्राधिकरणाच्या बैठकीत मंजूर करण्यात आला आहे. त्यात, म्हाडाच्या विविध मंडळांमार्फत राज्यात १५ हजार ६२३ घरे बांधली जातील. तसेच, त्यात मुंबईतील ४ हजार ६२३ घरांचाही अंतर्भाव आहे. म्हाडा प्राधिकरणाच्या २०२२-२३च्या १० हजार ६६४.९९ कोटी रुपये आणि २०२१-२२च्या सुधारित सुधारित ७,७९७.७४ कोटी रुपयांच्या अर्थसंकल्पास प्राधिकरणाने मंजुरी दिली. म्हाडाच्या २०२२-२३च्या अर्थसंकल्पात २,८८५.९२ कोटी रुपये आणि २०२१-२२च्या सुधारित अर्थसंकल्पात १,००९.०२ कोटी रुपयांची तूट दाखविण्यात आली आहे.
म्हाडाच्या २०२२-२३च्या अर्थसंकल्पात मुंबई, पुणे, नाशिक, नागपूर, अमरावती, औरंगाबाद, कोकण या प्रादेशिक मंडळांमार्फत राज्यभरात १५ हजार ७८१ घरे बांधली जातील. त्यासाठी अर्थसंकल्पात ७,०१९.३९ कोटी रुपयांची तरतूद केली आहे.
मुंबई मंडळासाठी २०२२-२३च्या अर्थसंकल्पात ३,७३८.४० कोटी रुपयांची तरतूद केली आहे. त्यातून, ४,६२३ घरे बांधली जाण्याचे प्रस्तावित केले आहे. त्यासह, मुंबई मंडळातर्फे बीडीडी चाळींच्या पुनर्विकास योजनेसाठी २,१३२.३४ कोटी रुपयांची तरतूद केली आहे. त्यासोबत पहाडी गोरेगाव येथील घरांच्या योजनेसाठी २५० कोटी रुपये, अँटॉप हिल येथील घरांच्या योजनेसाठी २९ कोटी रुपये, बॉम्बे डाइंग मिल (वडाळा) योजनेसाठी ६४ कोटी रुपये, कोपरी येथील पवईमधील योजनेसाठी १४५.५४ कोटी रुपये, मागाठणे येथील योजनेसाठी ५० कोटी रुपये, दिंडोशीतील खडकपाडा येथील योजनेसाठी १५ कोटी रुपयांची तरतूद केली आहे. गोरेगाव येथील सिद्धार्थनगर (पत्राचाळ) योजनेसाठी ४३५ कोटी रुपये, धारावी पुनर्विकास प्रकल्प टप्पा ‘ब’ साठी ९१.१८ कोटी रुपये, म्हाडा मुख्यालय असलेल्या गृहनिर्माण भवन इमारत दुरुस्ती, पुनर्विकासासाठी १५ कोटी रुपयांची तरतूद आहे.
कोकण मंडळासाठी सन २०२२-२३ च्या अर्थसंकल्पात १,९७१.५० कोटी रुपये, एवढी तरतूद आहे. मंडळातर्फे ७,५९२ घरे बांधली जाणार असून त्यात वर्तकनगर येथील पोलिस वसाहत पुनर्विकासासाठी २०० कोटी रुपयांची तरतूद आहे. ठाणे जिल्ह्यातील मफतलाल येथील भूसंपादन व भूविकासासाठी १,००२.५० कोटी रुपयांची तरतूद आहे.
पुणे मंडळासाठी २०२२-२३ च्या अर्थसंकल्पात ६६४.३२ कोटी रुपये तरतूद आहे. पुणे मंडळाने १,२५३ घरे बांधण्याचे ठरविले असून, पुणे जिल्ह्यातील धानोरी येथे भूसंपादन, भूविकासासाठी ३८० कोटी रुपयांची तरतूद केली आहे. नागपूर मंडळासाठी २०२२-२३च्या अर्थसंकल्पात ३८८.९७ कोटी रुपये तरतूद आहे. या मंडळाकडून १९५ घरे बांधली जाणार असून, भूसंपादन व भूविकासासाठी १६२.९२ कोटी रुपयांची तरतूद केली आहे.
औरंगाबाद मंडळासाठी २०२२-२३ अर्थसंकल्पात १३६.९० कोटी रु.ची तरतूद आहे. मंडळातर्फे १,७६२ घरे बांधली जाणार आहेत. तसेच, नाशिक मंडळासाठी सन २०२२-२३ च्या अर्थसंकल्पात ३५.७२ कोटी रुपये तरतूद आहे. नाशिक मंडळातर्फे २२० घरे बांधली जातील. अमरावती मंडळासाठी २०२२-२३ अर्थसंकल्पात ७५.५७ कोटी रुपये तरतूद असून, मंडळाकडून १३६ घरे बांधली जातील.
