महाराष्ट्राला गुडन्यूज मिळण्याची शक्यता, पेट्रोलवरील व्हॅट कमी करण्याचे उपमुख्यमंत्री अजित पवारांचे संकेत

पंतप्रधान नरेंद्र मोदी यांनी बुधवारी देशातील विविध मुख्यमंत्र्यांसोबत झालेल्या बैठकीत पेट्रोल आणि डिझेलवरील व्हॅट कर कपात करून जनतेला दिलासा देण्याचं आवाहन केलं होतं. सूत्रांनी दिलेल्या माहितीनुसार,पंतप्रधान मोदींच्या या आवाहनानंतर आता महाराष्ट्राचा वित्त विभाग यावर निर्णय घेण्याच्या विचारात आहे. याविषयी उपमुख्यमंत्री अजित पवार यांना विचारलं असता, पेट्रोलवरचा व्हॅट कमी करण्याचे संकेत त्यांनी दिले.

आजच्या मंत्रिमंडळ बैठकीत पेट्रोलवरील व्हॅट कमी करण्यासंबंधी काय मार्ग काढता येऊ शकतो याच्यावर चर्चा करुन निर्णय घेऊ, असं अजित पवार म्हणाले. गॅस दराबाबत दिलासा देण्याचा निर्णय महाराष्ट्र सरकारने याअगोदरच घेतला आहे. पेट्रोल परदेशातून आयात केल्यानंतर जो टॅक्स आहे त्यामध्ये केंद्र सरकारच्या टॅक्सपेक्षा थोडासा जास्त टॅक्स महाराष्ट्र सरकारचा आहे. त्यामुळे आजच्या मंत्रिमंडळ बैठकीत याविषयी चर्चा होऊ शकते, असं म्हणत व्हॅट कमी करण्याचे संकेत अजित पवार यांनी दिले.