“३० मिनिटांनंतर दिली होती पाकिस्तानला माहिती”; कॉंग्रेसच्या आरोपांवर जयशंकर यांचे स्पष्टीकरण

नवी दिल्ली : परराष्ट्र मंत्री एस जयशंकर यांनी पाकिस्तानमधील दहशतवादी छावण्यांवर भारताच्या कारवाईबाबत निवेदन दिले आहे. दहशतवादी तळांवरील कारवाई संपल्यानंतर ३० मिनिटांनी याबद्दल पाकिस्तानला माहिती देण्यात आली होती असे त्यांनी स्पष्ट केले आहे. काँग्रेसने परराष्ट्र मंत्र्यांवर आरोप केला होता की जयशंकर यांनी ऑपरेशन सिंदूरपूर्वीच पाकिस्तानला माहिती दिली होती.

या आरोपाबाबत एस जयशंकर म्हणाले की, तथ्ये चुकीची मांडण्याचा हा एक अप्रामाणिक प्रकार आहे. राहुल गांधी यांनी पाकिस्तानला माहिती देण्याचा हा प्रकार गुन्हा असल्याचे म्हटले होते. तर परराष्ट्र मंत्रालयाने स्पष्ट केले होते की, ऑपरेशन सुरू होण्यापूर्वी माहिती देण्यात आली नव्हती. भाजप आणि काँग्रेसमध्ये यावर बरेच आरोप प्रत्यारोप झाले होते.

दरम्यान, जयशंकर यांनी परराष्ट्र मंत्रालयाच्या संसदीय सल्लागार समितीच्या बैठकीचे अध्यक्षपद भूषवले. बैठकीनंतर त्यांनी याबाबतची माहिती सोशल मीडियावर दिली. ऑपरेशन सिंदूर आणि सर्व प्रकारच्या दहशतवादाविरुद्ध भारताच्या शून्य-सहिष्णुतेच्या धोरणावर चर्चा झाली. यावेळी आपल्याला एकत्र येऊन संदेश देण्याची गरज आहे असे त्यांनी नमूद केले.

हेही वाचा –  शेतीमध्ये दरवर्षी पाच हजार कोटींची भांडवली गुंतवणूक, मुख्यमंत्री देवेंद्र फडणवीस यांचा दावा

परराष्ट्रमंत्र्यांनी बैठकीत सांगितले की परराष्ट्र सचिवांना पहाटे १:३० वाजता ऑपरेशनची माहिती मिळाली, त्यानंतर प्रेस इन्फॉर्मेशन ब्युरोने एक निवेदन जारी केले. यानंतर, डीजीएमओने पाकिस्तानमधील त्यांच्या समकक्षांना ऑपरेशन सिंदूरबद्दल माहिती दिली. परराष्ट्रमंत्र्यांनी असेही सांगितले की भारत आणि पाकिस्तान यांच्यात युद्धबंदीचा निर्णय दोन्ही देशांच्या डीजीएमओंमधील दूरध्वनी संभाषणानंतर घेण्यात आला.

युद्धबंदीमध्ये अमेरिकेच्या सहभागासंबंधी प्रश्नांवर परराष्ट्रमंत्र्यांनी सांगितले की, भारताने अमेरिकेच्या परराष्ट्रमंत्र्यांना आणि काही इतर देशांना हे स्पष्ट केले आहे की पाकिस्तान थांबला तरच भारताचा हल्ला थांबेल, जर पाकिस्तानकडून हल्ला झाला तर भारत त्याला जोरदार प्रत्युत्तर देईल.

जयशंकर यांनी खासदारांना सांगितले की, भारताची रणनीती कारवाईच्या सुरुवातीलाच काही महत्त्वाच्या लक्ष्यांना लक्ष्य करण्याची होती. भारताची कारवाई पूर्णपणे यशस्वी झाली. भारतीय लष्करी दलांनी जिथे हल्ला करायचा होता तिथेच हल्ला केला. यामुळे पाकिस्तानचे लष्करी मनोबल खूपच खालावले होते. ते त्यांच्या दहशतवादी पायाभूत सुविधांचे रक्षण करू शकले नाहीत, हे त्यांची क्षमता दिसून येते.

महाईन्यूज-X वर फॉलो करा : महाईन्यूजला instagram वर फॉलो करा