‘त्याने’ २० रुपयांचा वडापाव १५ रुपयांना मागितला, त्यावरून वाद झाला आणि पुढे घडले भयंकर

अहमदनगरच्या एमआयडीसी भागातील नवनागापूर येथे ही घटना घडली. प्रवीण रमेश कांबळे (वय ३५ रा. बालिकाश्रम रोड, नगर) असे मृताचे नाव आहे. वडापाव विक्रेता व साथीदारांनी केलेल्या मारहाणीत ग्राहक प्रवीण रमेश कांबळे याचा मृत्यू झाला आहे. कांबळे हा नवनागापूर येथे एका वडापावच्या गाडीवर वडापाव घेण्यासाठी गेला होता. विक्रेत्याने एका वडापावचा भाव २० रुपये इतका सांगितला. कांबळे याने पंधरा रुपयांत देण्याची मागणी केली. त्यावरून वाद वाढत गेला. दोघेही हमरातुमरीवर आले. शिवीगाळ, धक्काबुक्कीही झाली.

हा वाद वाढत गेला. वडापावचा गाडी चालक आणि त्याच्या सहकाऱ्यांनी कांबळे याला मारहाण केली. त्यामध्ये कांबळे गंभीर जखमी झाला. त्याला उपचारासाठी जिल्हा रुग्णालयात दाखल करण्यात आले. तेथे उपचार सुरू असताना त्याचा मृत्यू झाला. प्रवीण कांबळे याच्या आईने दिलेल्या फिर्यादीवरून पोलिसांनी खुनाचा गुन्हा दाखल केला आहे. यामध्ये चार आरोपींना ताब्यात घेतले आहे. इतर आरोपींच्या शोधासाठी पोलिस पथके रवाना करण्यात आली असल्याची माहिती सहायक पोलीस निरीक्षक युवराज आठरे यांनी दिली.