गुजरातमध्ये हार्दिक पंड्यासाठी खास विजयी यात्रा

वडोदरा : टी २० वर्ल्ड कपनंतर हार्दिक पंड्याला प्रथमच गुजरातमध्ये दाखल झाला. त्यामुळे हार्दिकसाठी यावेळी खास विजयी यात्रा काढण्यात आली होती. हार्दिकची एक झलक पाहण्यासाठी यावेळी चाहत्यांनी एकच गर्दी केली होती. हार्दिकच्या या विजयी यात्रेचा व्हिडिओ चांगलाच व्हायरल झाला आहे.

हार्दिकने वर्ल्ड कप फायनलच्या अंतिम फेरीत अखेरचे महत्वाचे षटक टाकले होते. त्याचबरोबर या संपूर्ण वर्ल्ड कपमध्ये त्याने चांगली कामगिरी केली होती. त्यामुळे हार्दिकला चाहत्यांनी चांगला पाठिंबा दिला होता. वर्ल्ड कप जिंकल्यावर हार्दिक हा नवी दिल्ली आला होता. त्यानंतर हार्दिक संघाबरोबर मुंबईत गेला आणि तिथे त्यांची विजयी यात्रा निघाली. त्यानंतर हार्दिक हा अनंत अंबानी यांच्या लग्नासाठी मुंबईत थांबला होता. हे लग्न आटोपल्यावर हार्दिक अखेर आज सोमवारी गुजरातमध्ये दाखल झाला आणि त्यावेळी त्याचे जोरदार स्वागत करण्यात आले.

हार्दिकच्या या विजयी यात्रेसाठी एक खास ओपन बस मागवण्यात आली होती. या बसवर हार्दिक पंड्या हा वडोदराचा अभिमान आहे, असे लिहिलेले होते. यावेळी हार्दिक पंड्या या बसमध्ये आला आणि चाहत्यांनी त्याच्या नावाची घोषणा करायला सुरुवात केली. त्यावेळी हार्दिक या बसच्या पुढील भागात आला. हार्दिकने यावेळी चाहत्यांचे अभिवादन स्वीकारले. त्यानंतर हार्दिकने दोन्ही हातांनी चाहत्यांसाठी हातवारे केले, त्यानंतर चाहत्यांना फ्लाइंग किसही हार्दिकने दिला. यावेळी हार्दिकच्या नावाचा जोरदार जयघोष करण्यात आला. हार्दिकच्या हातात यावेळी तिरंगा होता. हार्दिक यावेळी तिरंगा फडकावत चाहत्यांचे अभिवादन स्वीकारत होता. हार्दिकची एक झलक पाहण्यासाठी यावेळी चाहत्यांनी चांगलीच गर्दी केली होती. त्यामुळे वडोदरा आज पूर्ण हार्दिकमय झाल्याचे पाहायला मिळाले होते.
मुंबईत येताच हार्दिक पांड्यानं वर्ल्ड कप ट्रॉफी उंचावली

हार्दिक पंड्याला आयपीएलमध्ये ट्रोल करण्यात आले होते. पण त्यानंतर टी २० वर्ल्ड कपमध्ये मात्र हार्दिकने सातत्याने दमदार कामगिरी केली. हार्दिकला जी वर्ल्ड कपमध्ये संधी मिळाली त्याचे त्याने सोने केले. अखेरच्या सामन्यात तर सर्वात महत्वाची जबबादारी ही हार्दिक पंड्यावर सोपवण्यात आली होती. पण हार्दिकने यावेळी आपल्यावरील विश्वास कायम ठेवला. हार्दिकने यावेळी अखेरचे षटक उत्तमपणे टाकले आणि भारताच्या विजयावर शिक्कामोर्तब केले.