चीनने भारतावर हल्ला केल्यास रशिया…; अमेरिकेने भारताला केले सावध

रशियाविरुद्ध रणनिती ठरवण्यात दलीप सिंह हे महत्त्वाची भूमिका बजावत आहे. ते काही दिवस भारत दौऱ्यावर आहेत. त्यापूर्वीच त्यांनी हे महत्त्वाचं वक्तव्य केलं आहे. चीनने भारतावर हल्ला केला तर भारताने या भ्रमामध्ये राहू नये की त्यांचा जुना मित्र असणारा रशिया हा भारताच्या बाजूने उभा राहील. कारण सध्या चीन आणि रशिया हे अधिक जवळ आलेत, असं दलीप सिंह यांनी म्हटलं आहे. रशिया आणि चीनमधील मैत्रीचे नातं हे फार घट्ट असून दोन्ही देश मित्रराष्ट्र आहेत, असंही त्यांनी नमूद केलं आहे.

रशियासोबत व्यापार करताना घाई करु नये, असं मतही त्यांनी व्यक्त केलं आहे. रशियाने युक्रेनवर गरज नसताना हल्ला केल्याने अनेक देशांनी रशियावर निर्बंध लादलेत. सध्या भारत रशियासोबत करत असणारा व्यापार हा या निर्बंधांच उल्लंघन करणारा असल्याचंही दलीप सिंह यांनी म्हटलं आहे. दरम्यान, रशियावर असलेले निर्बंध मागे घेण्याऱ्या देशांनाही त्यांनी इशारा दिला आहे.

दरम्यान, व्हाइट हाऊस’च्या माध्यम सचिव केट बेडिंगफिल्ड यांनी बुधवारी पत्रकार परिषद घेत रशियावर टिका केली. त्या म्हणाल्या, ‘लष्कराने दिशाभूल केल्याची भावना पुतिन यांची झाली आहे. त्यामुळे, पुतिन आणि लष्करातील वरिष्ठ अधिकारी यांच्यामध्ये सातत्याने तणाव निर्माण होत आहे. लष्कराची कामगिरी, निर्बंधांनंतर अर्थव्यवस्थेवरील परिणाम यांविषयी सल्लागारांनी सातत्याने पुतिन यांना खोटी माहिती दिली आहे. पुतिन यांना खरे सांगण्यास या सल्लागारांना भीती वाटते. युद्धाचा निर्णय ही पुतिन यांची घोडचूक ठरली असून, रशिया दिवसेंदिवस कमकुवत ठरत आहे. या आक्रमणाच्या सुरुवातीला रशियाच्या नेतृत्वाने कीव्हच्या दिशेने हल्ल्यांना सुरुवात करण्याच्या सूचना दिल्या. मात्र, आता युद्धाचे लक्ष्य सुधारित करण्यात आल्याचे सांगत आहेत.’