एप्रिलमध्ये उन्हाच्या झळा तीव्र होणार; वाचा हवामान विभागाने दिलेला इशारा
प्रतिनिधी, पुणेः वायव्य, मध्य भारतासह राज्यात एप्रिल महिन्यातील कमाल आणि किमान तापमान सरासरीपेक्षा जास्त राहण्याचा अंदाज ‘भारतीय हवामानशास्त्र विभागा’ने (आयएमडी) वर्तवला आहे. कोकणासह मध्य महाराष्ट्रात एप्रिलमध्ये पाऊस सरासरीपेक्षा जास्त राहण्याची शक्यता असून, हा विजांसह वादळी पाऊस असेल असेही ‘आयएमडी’ने म्हटले आहे.
एप्रिल महिन्यातील हवामानाच्या अंदाजासाठी आयोजित ऑनलाइन पत्रकार परिषदेत ‘आयएमडी’चे महासंचालक डॉ. मृत्युंजय महापात्रा यांनी ही माहिती दिली. या आधी मार्चच्या सुरुवातीला जाहीर केलेल्या हंगामी अंदाजात राज्याच्या काही भागांत मार्च ते मे या कालावधीत तीव्र उन्हाळा राहण्याची शक्यता ‘आयएमडी’ने वर्तवली होती. एप्रिलच्या हवामान अंदाजाबाबत डॉ. महापात्रा म्हणाले, ‘वायव्य, मध्य भारतासह महाराष्ट्रात एप्रिलमध्ये कमाल आणि किमान तापमान सरासरीपेक्षा जास्त राहण्याची शक्यता असून, या काळात उष्णतेच्या लाटा अनुभवायला मिळू शकतात. महाराष्ट्रात सध्या अनेक ठिकाणी तापमान सरासरीच्या वर नोंदले जात असून, ही स्थिती पुढील चार ते पाच दिवस कायम राहण्याची शक्यता आहे.’
‘दक्षिण आणि पूर्व भारतात मात्र कमाल आणि किमान तापमान सरासरीइतके किंवा त्यापेक्षा कमी राहू शकते. एप्रिलमध्ये दक्षिण भारतासह महाराष्ट्रातील कोकण आणि मध्य महाराष्ट्रात या महिन्याच्या सरासरीपेक्षा जास्त पावसाची शक्यता असून, या काळात विजांच्या गडगडाटासह वादळी पावसाची शक्यता असेल,’ असेही ते म्हणाले. दरम्यान, यंदा उत्तर गोलार्धातील उन्हाळ्यात प्रशांत महासागर आणि हिंदी महासागर या दोन्ही ठिकाणी मान्सूनसाठी प्रतिकूल स्थिती नसेल, असा ‘आयएमडी’चा अंदाज आहे. संपूर्ण उन्हाळ्यात प्रशांत महासागराच्या पृष्ठभागाचे तापमान सरासरीपेक्षा कमी राहण्याची शक्यता असून, तिथे ‘ला निना’ स्थिती कायम राहील. दुसरीकडे हिंदी महासागराच्या पूर्व आणि पश्चिम भागातील तापमानाची तफावत दर्शवणारा ‘इंडियन ओशन डायपोल’ (आयओडी) हा घटक न्यूट्रल स्थितीत राहण्याची शक्यता आहे. निगेटिव्ह स्थितीतील ‘आयओडी’ आणि ‘एल निनो’ हे दोन घटक मान्सूनवर बहुतेक वेळा प्रतिकूल परिणाम करतात असे आकडेवारी सांगते.
