रिक्षाचालकावर जीवघेणा हल्ला, फरफटत नेत कटरने सपासप वार
ठाणे : उल्हासनगरमध्ये एका रिक्षावाल्यावर जीवघेणा हल्ला करण्यात आल्याची धक्कादायक घटना घडली आहे. ही धक्कादायक घटना प्रत्यक्षदर्शींनी आपल्या मोबाईल कॅमेऱ्यात कैद केली. या हल्ल्यानंतर परिसरात तणाव निर्माण झाला होता. रक्ताने माखलेल्या या रिक्षावाल्याला रस्त्यावरुन फरफटत नेण्यात आलं. त्याआधी त्याच्यावर धारदार शस्त्राने सपासप वारही करण्यात आले होते. धारदार शस्त्राने करण्यात आलेल्या हल्ल्यात सदर रिक्षावाला गंभीर जखमी झाला होता. त्याचे कपडे रक्ताने पूर्णपण माखलेले होते.
हल्लेखोराने अक्षरशः भररस्त्यात या रिक्षावाल्याला लोळवलं आणि त्यानंतर त्याला रस्त्यावरुन फरफटतही नेलं होतं. उल्हासनगरच्या कॅम्प ४ परिसरामध्ये ही धक्कादायक घटना घडली होती. रविवारी सकाळी ११ वाजण्याच्या सुमारास उल्हासनगरच्या मोरया नगरी रोडवर रक्तरंजित थरार पाहायला मिळाला. आशेळेगाव गावदेवी मंदिराजवळ एक रिक्षाचालक रिक्षा घेऊन जात होता. त्यावेळी रिक्षात बसलेल्या व्यक्तीनेच रिक्षाचालकावर कटरने वार केले. अचानक झालेल्या हल्ल्याने रिक्षावालाही बिथरला.
यानंतर झालेल्या झटापटीमध्ये रिक्षा टेम्पोला जाऊन धडकली. यावेळी हल्लेखोराने रिक्षाचालकाला रिक्षाच्या बाहेर ओढलं आणि त्याला रस्त्यावर लोळवलं. रिक्षा चालकाला रस्त्यावर फरफटत नेल्यानंतर हल्लेखोर एका क्षणात तिथून निघून गेल्याचं मोबाईल कॅमेऱ्यात कैद झालं. रस्त्याच्या मधोमध जखमी रिक्षाचालक विव्हळत होता. यावेळी बघ्यांची गर्दीही झालेली होती. दरम्यान, हल्लेखोरावर विठ्ठलवाडी पोलीस स्टेशनमध्ये गुन्हा दाखल झाला आहे.