शरद पवारांच्या नावाची राष्ट्रपतीपदासाठी चर्चा, ममता बॅनर्जी शरद पवारांच्या भेटीला

ममता बॅनर्जी यांनी काही दिवसांपूर्वी २२ विरोधी पक्षांना पत्र लिहून एकत्र येण्याचे आवाहन केले होते. राष्ट्रपतीपदाच्या निवडणुकीत भाजपसमोर एकसंध विरोधकांचे चित्र मांडणं गरजेचं असल्याचं ममता बॅनर्जी यांनी म्हटलं होतं. त्या केवळ पत्र लिहून थांबल्या नाहीत तर त्या अनुषंगाने त्यांनी विरोधी पक्षातील नेत्यांच्या भेटीसाठीही सुरु केल्या आहेत. त्याच पार्श्वभूमीवर त्यांनी आज पवारांची भेट घेऊन चर्चा केली. ‘राष्ट्रपतीपदासाठी मी इच्छुक नाही. मी निवडणूक लढववणार नाही’, असं शरद पवार यांनी स्पष्ट केलं आहे. परंतु तरीही पवारांच्या नावाची राष्ट्रपतीपदासाठी चर्चा होतीय. देशभरातील काँग्रेस नेते तसंच विरोधी पक्षातील नेते पवारांच्या नावाच्या अनुषंगाने उलट सुलट वक्तव्य करीत आहेत. राष्ट्रपतीपदाच्या निवडणुकीसाठी पवारांची जरी इच्छी नसली तरी विरोधी पक्षाकडे पवारांएवढ्या पात्रतेचा नेता नाही. अशा परिस्थितीत ममता बॅनर्जी त्यांच्याशी बोलून त्यांचं मन वळविण्याचा प्रयत्न करु शकतात, अशी सूत्रांनी माहिती दिली आहे. दोघांमध्ये झालेल्या भेटीत याच अनुषंगाने अधिक चर्चा झाल्याची माहिती आहे.

१८ जुलै रोजी राष्ट्रपतीपदाची निवडणूक पार पडत आहे. या निवडणुकीच्या अनुषंगाने सत्ताधारी भाजप आणि विरोधी पक्षांचीही जोरदार तयारी सुरु आहे. राष्ट्रपतीपदाच्या निवडणुकीसाठी पश्चिम बंगालच्या मुख्यमंत्री ममता बॅनर्जी संपूर्ण विरोधकांना एकत्र करण्याचा प्रयत्न करत आहेत. त्याचाच भाग म्हणून दिल्लीच्या कॉन्स्टिट्युशन क्लबमध्ये तृणमुलच्या वतीने बैठक बोलावण्यात आली आहे. या बैठकीला सर्व विरोधी पक्षाचे नेते उपस्थित राहणार आहेत. पश्चिम बंगाल विधानसभेत मोठा विजय नोंदवल्यापासून ममता बॅनर्जी विरोधकांना एकत्र करण्यात गुंतल्या आहेत. त्यांनी सोनिया गांधी यांची भेट घेतली आहे, तसेच शरद पवार यांच्याशीही चर्चा केली आहे. वेळोवेळी पत्र लिहून इतर नेत्यांना एकत्र आणण्याचाही त्या प्रयत्न करत आहेत.