#CoronaVirus:नाशिकमध्ये सर्व रुग्णालये हाऊसफुल्ल,कोरोनाबाधित रुग्णांना घरीच थांबण्याचा सल्ला
नाशिक : नाशिकमध्ये दिवसेंदिवस कोरोना रुग्णांच्या संख्येत वाढ होत असल्याने महापालिकेचे सर्व हॉस्पिटल हाऊस फुल्ल झाले आहेत. शहरातील एकाही महापालिका रुग्णालयात बेड शिल्लक नाही. त्यामुळे कोरोनाबाधित रुग्णांना घऱीच थांबण्याचा सल्ला हॉस्पिटल प्रशासनाने दिला आहे .
नाशिकमध्ये हॉटस्पॉट असलेल्या जुने नाशिक परिसरात कोरोनाबाधित रुग्णांवर घरातच उपचार सुरु आहेत. त्यामुळे परिसरातील आणि कुटुंबातील प्रत्येकजण स्वत:ची वैयक्तिक काळजी घेत आहे.
नाशिक शहरात कोरोनाबाधितांचा आकडा 1000 च्या घरात पोहोचला आहे. तर जिल्ह्याचा आकडा 2500 वर पोहोचला आहे. दिवसेंदिवस रुग्णांच्या संख्येत वाढ होत असल्याने महापालिका प्रशासनाचीही चिंता वाढली आहे.
कोरोनाचा प्रादुर्भाव रोखण्यासाठी स्थानिक प्रशासनाकडून अनेक प्रयत्न सुरु आहेत. नुकतेच पुण्यातही सौम्य लक्षणं, अती सौम्य लक्षणं आणि लक्षणं नसणाऱ्या कोरोना रुग्णांवर घरीच उपचार करण्यात येणार आहे, अशा निर्णय पुणे महापालिकेने घेतला आहे.
पुणे शहरातील अ‍ॅक्टीव्ह रुग्णांची वाढती संख्या लक्षात घेऊन पालिका प्रशासनाने कोरोनाची सौम्य लक्षणे असलेल्या आणि राहण्याची स्वतंत्र व्यवस्था असणार्‍या रुग्णांना ‘होम क्वारंटाईन’ चा शिक्का मारून घरी सोडण्यासंबंधीची कार्यवाही सुरू केली आहे.
त्याशिवाय कोरोनाचे बहुतांशी रूग्ण हे झोपडपट्टी आणि दाट लोकवस्तीमध्ये राहणारे असल्याने घरच्या घरी उपचार आणि होम क्वारंटाईन शक्य नाही. त्यामुळे या परिसरातील रुग्णांना घरी उपचार करण्याची परवानगी दिली जाणार नाही.
