राष्ट्रवादी विरोधात काँग्रेस-भाजप एकत्र, महासभेत राजदंड पळवताना महापौरांनाही धक्काबुक्की
सांगली : प्रचंड गोंधळात सांगली महापालिकेची महासभा पार पडली. पॉईंट ऑफ ऑर्डर विषयावर बोलू न दिल्याने भाजप आणि काँग्रेस नगरसेवकांनी राजदंड पळवण्याचा प्रयत्न केला. त्यामुळे सभागृहांमध्ये प्रचंड गदारोळ निर्माण झाला आणि या दरम्यान महापौरांनाच धक्काबुक्की झाल्याचा प्रकार घडला आहे.
सांगली, मिरज आणि कुपवाड शहर महानगरपालिकेची महासभा आज पार पडली. सत्ताधारी राष्ट्रवादी काँग्रेस पक्ष असणाऱ्या काँग्रेसने राष्ट्रवादी विरोधात भाजपसोबत चांगलाच गोंधळ घातला. महासभा सुरू झाल्यानंतर पॉईंट ऑफ ऑर्डरच्या विषयावरून सदस्यांना बोलू न दिल्याचा आरोप करत भाजप आणि काँग्रेस नगरसेवकांनी संताप व्यक्त करत एकच गोंधळ घातला. या विषयावरून काँग्रेस आणि भाजप नगरसेविकांनी पीठासनाकडे धाव घेत राजदंड ताब्यात घेतला, यावेळी प्रचंड गोंधळ निर्माण झाला.
यानंतर महापौरांना सभेचे कामकाज आवरते घ्यावे लागले. यावेळी काँग्रेस आणि भाजप नगरसेवकांनी सभा सुरू ठेवण्याबाबत महापौरांना सूचना केल्या. मात्र, महापौरांनी अजेंड्यावरील सर्व विषय मंजूर करत सभा सोडून जाणे पसंद केले. यामुळे संतप्त झालेल्या भाजप आणि काँग्रेस नगरसेवकांनी महापौर दिग्विजय सूर्यवंशी यांना अडवण्याचा प्रयत्न केला. त्यामुळे सभागृहातील गदारोळ आणखी वाढला.
या दरम्यान महापौरांनी धक्काबुक्कीचा प्रकार घडला आहे. तर सभागृहातून महापौरांनी काढता पाय घेतल्याने संतप्त झालेल्या भाजप आणि काँग्रेस नगरसेवकांनी महापौर पळाले अशा घोषणांनी सभागृह दणाणून सोडला.
