मुंबई | मुंबईतील कलिना कॅम्पस परिसरात राहणारे सर्पमित्र अमान खान यांच्या घरात एक ते दीड फुटांच्या एक, दोन नव्हे, तर तब्बल १६ अजगरांच्या (मादी) पिल्लांनी जन्म घेतला आहे. अमान यांनी घरात एका थर्माकोलच्या बॉक्समध्ये १० मेपासून कृत्रिम व पोषक असे वातावरण निर्माण केल्यानंतर शुक्रवारपासून या अंड्यांमधून अजगराची पिल्ले बाहेर पडू लागली.
मुंबई महापालिकेच्या भांडुप संकुल येथील जंगलात बिबळ्या, साप, अजगर, काळवीट, ससे असे अनेक प्राणी वावरत असतात. एका अजगराने (मादी) काही अंडी भांडुप संकुलातील नाल्याच्या ठिकाणी उघड्यावर घातल्याचे १० मे रोजी सर्पमित्र हसमुख वळंजू (२९) यांना आढळून आले. त्यांनी त्यांचा सांताक्रूझ, कलिना कॅम्पस येथे राहणारा सर्पमित्र अमान खान यांना ही बाब कळवली. अमान यांनी वन खात्याच्या परवानगीने अंडी घरी आणली. त्या अंड्यांना थर्माकोलच्या मोठ्या बॉक्समध्ये ठेवले व त्यात कृत्रिम वातावरण निर्माण केले.
अखेर शुक्रवारपासून १७पैकी १६ अंड्यांमधून पिल्ले बाहेर पडण्यास सुरुवात झाली. शनिवारपर्यंत ‘किंग बेबी’ व नंतर आणखी एक अशी दोन पिल्ले जन्माला आली. ‘किंग बेबी’ने इतर अंड्यांच्या भोवती हालचाल सुरू करून इतरांना अंड्यांतून बाहेर येण्यासाठी प्रोत्साहित केले, असे सर्पतज्ज्ञांचे म्हणणे आहे. या पिल्लांना थोडे मोठे झाल्यावर नैसर्गिक अधिवासात सोडणार आहे, अशी माहिती अमान यांनी दिली.
देशातली तिसरी घटना?
देशात यापूर्वी ओडिसा व चेन्नई या दोन ठिकाणी काही वर्षांपूर्वी अजगराच्या अंड्यांना कृत्रिम पद्धतीने पोषक वातावरण निर्माण करून अंडे उबवून त्यातून अजगराच्या पिल्लांनी जन्म घेतला होता. त्यानंतर महाराष्ट्रात व मुंबईत पहिली, तर देशातील ही तिसरी घटना असल्याचा दावा करण्यात आला आहे.
