Aamir Khan : अभिनेता आमीर खान ‘शिवतीर्था’वर, राज ठाकरेंशी तासभर गप्पा
मुंबई : अभिनेता आमीर खान (Aamir Khan) याने महाराष्ट्र नवनिर्माण सेनेचे अध्यक्ष राज ठाकरे (Raj Thackeray) यांची भेट घेतली. राज ठाकरे यांच्या शिवतीर्थ निवासस्थानी ही भेट झाली. दोघांमध्ये जवळपास एक तासभर चर्चा झाल्याची माहिती आहे. या भेटीचा नेमका तपशील उपलब्ध झालेला नाही. दोघांमध्ये कुठल्या विषयावर गप्पा झाल्या, हे स्पष्ट झालेलं नाही. परंतु आमीर खानचा चित्रपट लालसिंह चढ्ढावर बहिष्कार टाकण्याची मागणी होत आहे, या पार्श्वभूमीवर ही भेट महत्त्वपूर्ण मानली जात आहे.
मुंबईतील छत्रपती शिवाजी महाराज पार्क परिसरात असलेल्या मनसे अध्यक्ष राज ठाकरे यांच्या शिवतीर्थ निवासस्थानी ही भेट झाली. मंगळवारी संध्याकाळच्या सुमारास आमीर खान भेटीसाठी आला होता. यावेळी दोघांमध्ये जवळपास तासभर गप्पा रंगल्या. दोघांनी कुठल्या विषयावर चर्चा केली, हे अद्याप समोर आलेलं नाही.
सिनेमाची बॉक्स ऑफिसवर निराशाजनक कामगिरी
दरम्यान, आमिरचा ‘लाल सिंह चड्ढा’ हा सिनेमा प्रेक्षकांच्या फारसा पसंतीस उतरला नाही. खरं तर या सिनेमासाठी आमिरनं खूप मेहनत घेतली होती. लाल सिंह चड्ढा सिनेमा फॉरेस्ट गम्प या हॉलिवूड सिनेमावर आधारित आहे. या सिनेमाचे हक्क विकत घेण्यासाठी आमिरनं खूप मेहनत घेतली होती. तसंच सिनेमा तयार करण्यासाठी तितकेच परिश्रमही घेतले.
सिनेमा प्रदर्शित झाल्यानंतर बॉक्स ऑफिसवर अवघ्या पाच दिवसांमध्ये केवळ ४८ कोटी रुपयांचा गल्ला जमला आहे. बॉक्स ऑफिवर या सिनेमाला चांगला प्रतिसाद न मिळाल्यानं आमिर खूच निराश झाला असून त्याला मोठा धक्का बसला. आमिरच्या जवळच्या सूत्रांनी दिलेल्या माहितीनुसार सिनेमा अपयशी ठरल्यानं तो खूपच दुःखी झाला आहे. त्यातच त्यानं सिनेमाच्या वितरकांना त्यांचे पैसे परत करण्याचा निर्णय घेतल्याचे कळते.