शरद पवारांचा मुख्यमंत्री देवेंद्र फडणवीस यांना फोन; सामाजिक सलोखा राखण्याचे केले आवाहन
पुणे : यवत येथे दोन गटांमध्ये झालेल्या तणावाच्या घटनेनंतर निर्माण झालेल्या परिस्थितीवर राष्ट्रवादी काँग्रेसचे अध्यक्ष आणि खासदार शरद पवार यांनी तीव्र चिंता व्यक्त केली आहे. या घटनेचे पडसाद उमटू नयेत आणि सामाजिक सलोखा कायम राहावा, यासाठी त्यांनी आज (दि.2) थेट मुख्यमंत्री देवेंद्र फडणवीस यांच्याशी दूरध्वनीवरून चर्चा केली. या संवेदनशील विषयावर प्रशासनाने तातडीने लक्ष घालून योग्य त्या उपाययोजना कराव्यात, अशी सूचना पवार यांनी मुख्यमंत्र्यांना केली.
यवत परिसरात शुक्रवारी (दि.१) घडलेल्या एका स्थानिक वादामधून दोन गटांमध्ये संघर्ष निर्माण झाला होता. या घटनेमुळे परिसरात काही काळासाठी तणावाचे वातावरण निर्माण झाले होते. या घटनेची माहिती मिळताच, ज्येष्ठ नेते शरद पवार यांनी परिस्थितीचे गांभीर्य ओळखले. त्यांनी आज (दि.२) सकाळी मुख्यमंत्री देवेंद्र फडणवीस यांना फोन करून या विषयावर सविस्तर चर्चा केली. या चर्चेदरम्यान, पवार यांनी प्रशासनाला अधिक सतर्क राहण्याची गरज असल्याचे मत व्यक्त केले.
ज्येष्ठ नेते शरद पवार यांनी परिसरातील सामाजिक वातावरण बिघडू नये, यासाठी पोलीस आणि स्थानिक प्रशासनाने मिळून शांतता प्रस्थापित करण्यासाठी प्रयत्न करावेत. अफवा पसरवणाऱ्यांवर आणि समाजात तेढ निर्माण करणाऱ्यांवर कठोर कायदेशीर कारवाई करावी. शांतता समितीच्या बैठका घेऊन दोन्ही समाजांतील प्रमुख नागरिकांशी संवाद साधावा, जेणेकरून गैरसमज दूर होतील. या प्रकरणात दोषी असलेल्यांवर निश्चित कारवाई व्हावी, मात्र कोणत्याही निरपराध नागरिकाला त्रास होणार नाही, याची काळजी प्रशासनाने घ्यावी, अशा सूचना मुख्यमंत्री फडणवीस यांना दिल्या आहे.
हेही वाचा – … तर तुमची अटक होईल, राज ठाकरेंचं भाषणातून सरकारला चॅलेंज; गृहमंत्री फडणवीसाचं थेट प्रत्युत्तर
खासदार शरद पवार यांनी व्यक्त केलेल्या चिंतेची मुख्यमंत्री देवेंद्र फडणवीस यांनी तात्काळ दखल घेतली. त्यांनी पवार यांना परिस्थिती नियंत्रणात आणण्यासाठी सरकार सर्वतोपरी प्रयत्न करत असल्याचे आश्वासन दिले. “या प्रकरणात आम्ही पूर्ण लक्ष ठेवून आहोत. शांतता आणि सुव्यवस्था राखणे हे सरकारचे सर्वोच्च प्राधान्य आहे आणि त्यासाठी आवश्यक ते सर्व निर्देश प्रशासनाला देण्यात आले आहेत,” असे मुख्यमंत्र्यांनी पवार यांना सांगितल्याचे समजते.
राज्यातील एका संवेदनशील घटनेवर, एका ज्येष्ठ आणि अनुभवी विरोधी पक्ष नेत्याने थेट मुख्यमंत्र्यांशी संवाद साधून चिंता व्यक्त करणे, हे राज्याच्या राजकीय परिपक्वतेचे लक्षण मानले जात आहे. पक्षीय राजकारणाच्या पलीकडे जाऊन, सामाजिक सलोखा टिकवण्यासाठी अशा प्रकारचा संवाद अत्यंत महत्त्वाचा ठरतो. या चर्चेमुळे प्रशासकीय पातळीवर अधिक वेगाने हालचाली होऊन परिस्थिती लवकरच पूर्वपदावर येईल, अशी अपेक्षा व्यक्त केली जात आहे. आता प्रशासन या सूचनांवर कशी अंमलबजावणी करते, याकडे संपूर्ण राज्याचे लक्ष लागले आहे.
