दिवाळीपूर्वी ७३ लाख शेतकऱ्यांच्या खात्यात ५ हजार रुपये जमा; कर्जमाफीचेही ४,७६४ कोटी वितरित, फडणवीस यांची माहिती

मुंबई : राज्यातील दुष्काळग्रस्त शेतकऱ्यांसाठी राज्य सरकारकडून दिवाळीपूर्वी दिल्या जाणाऱ्या पाच हजार रुपयांच्या अग्रिम मदतीचे वितरण सुरू आहे. आतापर्यंत ७३ लाख शेतकऱ्यांच्या बँक खात्यांमध्ये मदतीची रक्कम जमा झाली असून, उर्वरित पात्र शेतकऱ्यांच्या खात्यांत पुढील दोन दिवसांत पैसे जमा होतील, अशी माहिती मुख्यमंत्री देवेंद्र फडणवीस यांनी दिली. तसेच पुण्यश्लोक अहिल्यादेवी होळकर कर्जमाफी योजनेअंतर्गत आणखी ४ लाख ८६ हजार शेतकऱ्यांच्या खात्यांत ४,७६४ कोटी रुपये जमा करण्यात आल्याचेही त्यांनी सांगितले.

७३ लाख शेतकऱ्यांना पाच हजारांची मदत

दुष्काळग्रस्त शेतकऱ्यांना दिवाळीपूर्वी दिलासा देण्यासाठी राज्य सरकारने प्रत्येकी पाच हजार रुपये अग्रिम मदत देण्याचा निर्णय घेतला होता. केंद्र सरकारच्या मदतीची प्रतीक्षा न करता राज्य सरकारने ही मदत देण्याची घोषणा केली होती.

मुख्यमंत्री फडणवीस यांनी दिलेल्या माहितीनुसार, आतापर्यंत ७३ लाख शेतकऱ्यांच्या खात्यांमध्ये पैसे जमा झाले आहेत. पुढील दोन दिवसांत जवळपास ९५ टक्के शेतकऱ्यांपर्यंत ही मदत पोहोचेल. काही बँक खात्यांमधील तांत्रिक अडचणींमुळे उर्वरित रक्कम जमा होण्यास वेळ लागत असल्याचेही त्यांनी स्पष्ट केले.

कर्जमाफी योजनेत आणखी ४,७६४ कोटींचे वितरण

पुण्यश्लोक अहिल्यादेवी होळकर कर्जमाफी योजनेअंतर्गत आज आणखी ४ लाख ८६ हजार शेतकऱ्यांच्या खात्यांमध्ये ४,७६४ कोटी रुपये जमा करण्यात आल्याची माहिती मुख्यमंत्र्यांनी दिली.

या टप्प्यात मराठवाड्यातील शेतकऱ्यांना मोठा लाभ मिळाला आहे. या भागातील सुमारे २ लाख ७६ हजार शेतकऱ्यांच्या खात्यांत कर्जमाफीची रक्कम जमा करण्यात आली आहे.

हेही वाचा –  अतिउष्ण चहा-कॉफी पिण्याची सवय ठरू शकते धोकादायक; अन्ननलिकेच्या कर्करोगाचा धोका वाढण्याची शक्यता

आतापर्यंत २१ लाख शेतकऱ्यांना कर्जमाफीचा लाभ

मुख्यमंत्र्यांच्या माहितीनुसार, आतापर्यंत जवळपास २१ लाख शेतकऱ्यांच्या खात्यांत कर्जमाफीची रक्कम जमा करण्यात आली असून, त्यासाठी सुमारे १९ हजार कोटी रुपये वितरित करण्यात आले आहेत.

सध्या लाभार्थ्यांच्या याद्यांचे प्रमाणीकरण सुरू आहे. याद्यांची पडताळणी पूर्ण होत जाईल, त्यानुसार पात्र शेतकऱ्यांच्या खात्यांत कर्जमाफीची रक्कम जमा करण्याची प्रक्रिया सुरू राहणार असल्याचे फडणवीस यांनी सांगितले.

शेतकऱ्यांसोबत दिवाळी साजरी करण्याचा सरकारचा प्रयत्न

राज्य सरकारमधील सर्व मंत्र्यांशी चर्चा करून शेतकऱ्यांसोबत दिवाळी साजरी करण्याचा निर्णय घेतल्याचे मुख्यमंत्र्यांनी सांगितले. दिवाळीनिमित्त मंत्र्यांनी शेतकऱ्यांच्या घरी जाऊन त्यांच्यासोबत सण साजरा करण्याचा प्रयत्न करावा, अशी भूमिका असल्याचे त्यांनी स्पष्ट केले.

राज ठाकरेंच्या आंदोलनावरील टीकेला फडणवीसांचे उत्तर

राज ठाकरे यांनी आंदोलनांबाबत केलेल्या प्रतिक्रियेवर बोलताना मुख्यमंत्री फडणवीस यांनी आपल्या मोर्चांचा उद्देश संविधानाचे संरक्षण आणि अराजकतेला विरोध करणे हा असल्याचे सांगितले. इंडिया आघाडीच्या राजकीय भूमिकेवर टीका करत, संविधान आणि लोकशाहीच्या समर्थनार्थ आपले मोर्चे सुरू राहतील, असेही त्यांनी स्पष्ट केले.

राजू शेट्टी यांच्या आंदोलनावर चर्चेतून तोडगा काढण्याचे आवाहन

राजू शेट्टी यांच्या आंदोलन आणि रास्ता रोकोबाबत बोलताना फडणवीस यांनी या आंदोलनामुळे सर्वाधिक नुकसान शेतकऱ्यांचेच होत असल्याचे म्हटले. ऊस उत्पादक शेतकरी आणि साखर कारखानदार यांच्यातील एफआरपीपेक्षा अधिक दराच्या मागणीवर चर्चा सुरू असल्याचे त्यांनी सांगितले.

एफआरपी देणे कारखान्यांसाठी बंधनकारक असून, त्यापेक्षा अधिक दर मिळावा अशी शेतकऱ्यांची मागणी आहे. या प्रश्नावर राज्य सरकार मध्यस्थीची भूमिका बजावत असल्याचे मुख्यमंत्र्यांनी स्पष्ट केले. तसेच मंत्री हसन मुश्रीफ यांनाही मध्यस्थी करून चर्चेतून तोडगा काढण्यास सांगितल्याचे त्यांनी सांगितले.

महाईन्यूज-X वर फॉलो करा : महाईन्यूजला instagram वर फॉलो करा