राज्य सरकारचा मोठा निर्णय; राज्यात १,४४० डॉक्टरांच्या नियुक्त्या; आरोग्य विभागासाठी आजचा दिवस ऐतिहासिक – उपमुख्यमंत्री एकनाथ शिंदे

मुंबई : महाराष्ट्राच्या आरोग्य विभागासाठी आजचा दिवस ऐतिहासिक असल्याचे उपमुख्यमंत्री एकनाथ शिंदे यांनी सांगितले. राज्यात एकाचवेळी १,४४० एमबीबीएस आणि स्पेशालिस्ट डॉक्टरांच्या नियुक्त्या करण्यात आल्या आहेत. या नियुक्त्यांमुळे राज्यातील प्राथमिक आरोग्य केंद्रे, उपजिल्हा रुग्णालये आणि जिल्हा रुग्णालयांमधील डॉक्टरांची कमतरता दूर होण्यास मदत होणार आहे. तसेच आणखी सुमारे ५०० डॉक्टर लवकरच सेवेत दाखल होणार असल्याची माहिती शिंदे यांनी दिली.

आरोग्य यंत्रणेला मिळणार बळ

राज्यातील ग्रामीण आणि दुर्गम भागातील आरोग्य सेवांमध्ये डॉक्टरांची कमतरता हा महत्त्वाचा प्रश्न आहे. नव्याने करण्यात आलेल्या १,४४० डॉक्टरांच्या नियुक्त्यांमुळे आरोग्य यंत्रणेवरील ताण कमी होण्याची अपेक्षा आहे. आणखी ५०० डॉक्टर उपलब्ध झाल्यानंतर आरोग्य सेवांना अधिक बळ मिळेल, असेही शिंदे यांनी सांगितले.

हेही वाचा –  सर्वोच्च न्यायालयात मुंबई महापालिकेची माफी; आयुक्त अश्विनी भिडे यांच्या वेतन स्थगिती प्रकरणात महत्त्वाची घडामोड

दुष्काळग्रस्त शेतकऱ्यांना दिवाळीपूर्वी ५ हजारांची मदत

दरम्यान, दुष्काळग्रस्त शेतकऱ्यांसोबत दिवाळी साजरी करण्याचा निर्णय सरकारने घेतल्याचे एकनाथ शिंदे यांनी स्पष्ट केले. दुष्काळग्रस्त शेतकऱ्यांना दिवाळीपूर्वी ५ हजार रुपयांची तातडीची मदत देण्यात येत असल्याचे त्यांनी सांगितले. राज्य आणि केंद्र सरकार शेतकऱ्यांच्या पाठीशी ठामपणे उभे असल्याचा विश्वासही त्यांनी व्यक्त केला.

शेतकऱ्यांना मदत मिळवून देण्यासाठी शिवसेनेच्या वतीने तालुकास्तरावर मदत कक्ष उभारण्यात येणार असल्याची माहितीही शिंदे यांनी दिली.

विरोधकांच्या आंदोलनांवरही टीका

विरोधकांची आंदोलने आणि संविधानाच्या मुद्द्यावर बोलताना एकनाथ शिंदे यांनी विरोधकांवर जोरदार टीका केली. त्यांच्या या वक्तव्यामुळे राजकीय वर्तुळातही चर्चा सुरू झाली आहे.

एकीकडे आरोग्य विभागातील मोठ्या प्रमाणावरील नियुक्त्या, तर दुसरीकडे दुष्काळग्रस्त शेतकऱ्यांसाठी मदतीची घोषणा, अशा दोन्ही मुद्द्यांवर शिंदे यांनी सरकारची भूमिका मांडली.

महाईन्यूज-X वर फॉलो करा : महाईन्यूजला instagram वर फॉलो करा