CM फडणवीस ‘ON FIRE MODE’; पदांची मागणी करण्यापूर्वी कामाचा हिशेब द्या!
पुण्यात भाजप नगरसेवकांची फडणवीसांकडून कानउघाडणी; कमी मतदार नोंदणी, प्रचारातील अनुपस्थितीवर नाराजी
पुणे | पक्षातील पदांसाठी आग्रह धरणाऱ्या नगरसेवकांना आता निवडणुकीतील कामाचा हिशेब द्यावा लागणार आहे. पुणे विभागातील शिक्षक आणि पदवीधर मतदारसंघाच्या निवडणुकीच्या पार्श्वभूमीवर मुख्यमंत्री देवेंद्र फडणवीस यांनी भाजपच्या नगरसेवकांची कानउघाडणी केल्याचे वृत्त आहे. पदांची मागणी करताना संबंधितांच्या कामाचे ‘रिपोर्ट कार्ड’ तपासले जाईल, असा स्पष्ट संदेश त्यांनी दिल्याचे वृत्तमाध्यमांनी म्हटले आहे.
बुधवारी, १४ ऑक्टोबर रोजी पुण्यात झालेल्या बैठकीत फडणवीस यांनी निवडणूक तयारीचा आढावा घेतला. नगरसेवकांनी निवडणुकीच्या कामाला सक्रियपणे लागावे आणि आपल्या भागातून जास्तीत जास्त मतदान घडवून आणण्यासाठी प्रयत्न करावेत, अशा सूचना त्यांनी केल्याचे समजते. पक्षातील पुढील जबाबदाऱ्यांसाठी केलेल्या कामाचे मूल्यमापन महत्त्वाचे ठरेल, अशी भूमिका त्यांनी मांडल्याचे वृत्त आहे.
हेही वाचा
सत्ता असूनही नोंदणी कमी का?
पुणे आणि पिंपरी-चिंचवड महापालिकांसह जिल्ह्यात भाजपची सत्ता असतानाही मतदार नोंदणी अपेक्षेप्रमाणे का झाली नाही, अशी विचारणा मुख्यमंत्र्यांनी केल्याचे लोकसत्ताच्या वृत्तात नमूद आहे. शिक्षक आणि पदवीधर मतदारसंघाच्या प्रचारात स्थानिक नगरसेवकांच्या अनुपस्थितीवरही त्यांनी नाराजी व्यक्त केली. निवडणुकीतील संघटनात्मक कामाकडे दुर्लक्ष करणाऱ्यांना या बैठकीत स्पष्ट शब्दांत जाब विचारण्यात आल्याचे वृत्तातून समोर आले आहे.
पदांसाठी कामगिरीची कसोटी
केवळ पदांची अपेक्षा व्यक्त करून चालणार नाही; पक्षासाठी केलेले कामही दाखवावे लागेल, हा बैठकीतील प्रमुख संदेश असल्याचे वृत्त आहे. नगरसेवकांनी आपल्या भागातील मतदारांशी संपर्क वाढवून प्रत्यक्ष मतदानासाठी विशेष प्रयत्न करण्याच्या सूचना देण्यात आल्याचे समजते. त्यामुळे आगामी निवडणुकीत भाजप नगरसेवकांच्या संघटनात्मक कामगिरीकडेही लक्ष असणार आहे.
महाईन्यूज-X वर फॉलो करा : महाईन्यूजला instagram वर फॉलो करा
