जसप्रीत बुमराह न्यूझीलंडविरुद्धच्या वनडे मालिकेला मुकणार? कसोटीवर लक्ष केंद्रित करण्याचा संघ व्यवस्थापनाचा सल्ला
नवी दिल्ली | सध्या भारत आणि वेस्ट इंडिज यांच्यात टी-२० मालिका सुरू असून, या मालिकेनंतर भारतीय संघ न्यूझीलंड दौऱ्यावर जाणार आहे. या दौऱ्यात टी-२०, एकदिवसीय (ODI) आणि कसोटी मालिका खेळवली जाणार आहे. टी-२० मालिकेसाठी भारतीय संघाची घोषणा आधीच झाली असून, लवकरच वनडे व कसोटी संघ जाहीर होणार आहेत. त्यापूर्वीच समोर आलेल्या मोठ्या वृत्तानुसार, भारताचा आघाडीचा वेगवान गोलंदाज जसप्रीत बुमराहला न्यूझीलंडविरुद्धच्या आगामी वनडे मालिकेतून विश्रांती दिली जाण्याची दाट शक्यता आहे.
‘टाईम्स ऑफ इंडिया’ने दिलेल्या वृत्तानुसार, बुमराह पूर्णपणे तंदुरुस्त (Fit) आहे. मात्र, त्याच्या कामाचा ताण (Workload Management) नियंत्रित ठेवण्यासाठी त्याने सध्या प्रामुख्याने कसोटी क्रिकेटवरच लक्ष केंद्रित करावे, अशी टीम मॅनेजमेंटची स्पष्ट भूमिका आहे. आगामी अत्यंत महत्त्वाच्या कसोटी मालिका लक्षात घेता बुमराहला दुखापतीपासून दूर ठेवणे आणि ताज्यातवान्या स्थितीत मैदानात उतरवणे हे व्यवस्थापनाचे मुख्य उद्दिष्ट आहे.
हेही वाचा
पुणे जिल्ह्यातून सुका व ओला चारा वाहतुकीवर बंदी; जिल्हाधिकाऱ्यांचे आदेश जारी
न्यूझीलंडविरुद्धच्या पहिल्या कसोटी सामन्यासाठी वेलिंग्टनमध्ये मुख्य संघात दाखल होण्यापूर्वी बुमराहने सराव म्हणून ‘भारत अ’ (India A) संघाकडून एक सामना खेळावा, अशी व्यवस्थापनाची योजना आहे. भारत अ आणि न्यूझीलंड अ यांच्यातील तिसरा अनधिकृत चार दिवसीय कसोटी सामना ७ नोव्हेंबरपासून सुरू होणार आहे. या तिसऱ्या सामन्यासाठी अजून संघ घोषित करण्यात आलेला नसून, यामध्ये बुमराहला खेळवले जाऊ शकते. यामुळे त्याला कसोटी मालिकेपूर्वी प्रत्यक्ष सामन्यातील लय (Match Fitness) तपासण्याची उत्तम संधी मिळेल.
पुढील व्यस्त वेळापत्रक आणि विश्रांतीची रणनीती
न्यूझीलंड दौऱ्यानंतर श्रीलंका आणि झिम्बाब्वेचे संघ भारत दौऱ्यावर येणार आहेत. त्यानंतर भारताची ऑस्ट्रेलियाविरुद्ध प्रतिष्ठेची ‘बॉर्डर-गावसकर ट्रॉफी’ रंगणार आहे. ऑस्ट्रेलियाविरुद्धच्या या महामुकाबल्यासाठी बुमराह पूर्णपणे तंदुरुस्त असावा, यासाठीच त्याला न्यूझीलंडविरुद्धच्या वनडे मालिकेसह श्रीलंका व झिम्बाब्वेविरुद्धच्या मर्यादित षटकांच्या मालिकांमधूनही विश्रांती दिली जाण्याचे संकेत आहेत.
महाईन्यूज-X वर फॉलो करा : महाईन्यूजला instagram वर फॉलो करा
