महाराष्ट्रात जपानी उद्योगांसाठी गुंतवणुकीच्या नव्या संधी; ‘जपानने महाराष्ट्राकडे धोरणात्मक भागीदार म्हणून पाहावे’

मुंबई : भारत-जपान आर्थिक संबंधांना अधिक व्यापक आणि मजबूत दिशा देण्यासाठी महाराष्ट्र महत्त्वाची भूमिका बजावेल, असा विश्वास वस्त्रोद्योग मंत्री संजय सावकारे यांनी व्यक्त केला. जपानी उद्योगांनी महाराष्ट्राकडे केवळ गुंतवणुकीचे केंद्र म्हणून न पाहता, भारतासह जागतिक बाजारपेठेत विस्तार करण्यासाठी धोरणात्मक भागीदार आणि सक्षम लॉजिस्टिक्स हब म्हणून पाहावे, असे आवाहन त्यांनी केले.

वांद्रे येथील हॉटेल ताज लँड्स एन्डमध्ये निक्केई एशिया आणि कॉन्फेडरेशन ऑफ इंडियन इंडस्ट्री (CII) यांच्या संयुक्त विद्यमाने आयोजित **‘निक्केई इंडिया-जपान इकॉनॉमी अँड इन्व्हेस्टमेंट फोरम’**मध्ये ते बोलत होते. यावेळी भारतातील जपानचे राजदूत केइची ओनो यांच्यासह भारत आणि जपानमधील उद्योग क्षेत्रातील अनेक मान्यवर उपस्थित होते.

उत्पादन आणि तंत्रज्ञान क्षेत्रात मोठी संधी

भारत आणि जपानचे संबंध परस्पर विश्वास, आदर आणि समान मूल्यांवर आधारित असल्याचे सावकारे यांनी सांगितले. उत्पादन, तंत्रज्ञान, नवोन्मेष, पुरवठा साखळी आणि शाश्वत विकास या क्षेत्रांमध्ये दोन्ही देशांना एकत्र काम करण्याची मोठी संधी आहे.

जपानकडे प्रगत तंत्रज्ञान, अचूकता, गुणवत्ता आणि उत्पादन क्षेत्रातील जागतिक अनुभव आहे. दुसरीकडे भारताकडे मोठी बाजारपेठ, कुशल तरुण मनुष्यबळ आणि व्यापक आर्थिक क्षमता आहे. या दोन्ही शक्तींच्या संगमातून भारत-जपान आर्थिक भागीदारीला नवी उंची मिळू शकते, असे सावकारे यांनी नमूद केले.

हेही वाचा –  GST सुधारणा : करदात्यांना मोठा दिलासा; थेट अटकेची तरतूद रद्द, खटल्याची मर्यादा ₹१ कोटींवरून ₹५ कोटी

महाराष्ट्रात विविध क्षेत्रांत गुंतवणुकीची क्षमता

महाराष्ट्र हे देशातील प्रमुख आर्थिक आणि औद्योगिक केंद्र असल्याचे सांगताना सावकारे यांनी राज्यातील विविध क्षेत्रांमधील संधींची माहिती दिली. ऑटोमोबाईल, इलेक्ट्रिक मोबिलिटी, इलेक्ट्रॉनिक्स, प्रगत अभियांत्रिकी, रसायने, जीवन विज्ञान, स्वच्छ ऊर्जा, लॉजिस्टिक्स, कृषी आणि वस्त्रोद्योग या क्षेत्रांमध्ये महाराष्ट्रात मोठी क्षमता असल्याचे त्यांनी सांगितले.

वस्त्रोद्योग हे मोठ्या प्रमाणावर रोजगार निर्माण करणारे क्षेत्र असून, तंत्रज्ञान, कौशल्य, पायाभूत सुविधा आणि बाजारपेठ यांचा समन्वय साधून जागतिक स्तरावर स्पर्धात्मक परिसंस्था उभारण्याचे राज्य सरकारचे उद्दिष्ट असल्याचेही त्यांनी स्पष्ट केले.

२.९१ लाख रोजगारनिर्मितीची शक्यता

‘महाराष्ट्र इन्व्हेस्टमेंट समिट’दरम्यान विविध सामंजस्य करार करण्यात आले असून, त्यातून सहा प्रमुख क्षेत्रांमध्ये गुंतवणूक येत आहे. या गुंतवणुकीतून २ लाख ९१ हजार नव्या रोजगारांची निर्मिती होणार असल्याचे सावकारे यांनी सांगितले.

जागतिक कंपन्या आपल्या पुरवठा साखळीचे विविधीकरण आणि बळकटीकरण करण्यावर भर देत आहेत. या पार्श्वभूमीवर जपानी कंपन्यांसाठी महाराष्ट्रात स्थिर, स्पर्धात्मक आणि दीर्घकालीन उत्पादन व सेवा केंद्र उभारण्याच्या मोठ्या संधी उपलब्ध असल्याचे त्यांनी नमूद केले.

जपानची तांत्रिक क्षमता आणि महाराष्ट्राची औद्योगिक ताकद यांचा समन्वय साधल्यास भारत-जपान आर्थिक भागीदारी आणखी मजबूत होईल, असा विश्वास मंत्री संजय सावकारे यांनी व्यक्त केला.

महाईन्यूज-X वर फॉलो करा : महाईन्यूजला instagram वर फॉलो करा