‘मतचोरीचा जप करता, पण मेंदूच चोरीला गेलाय’; राहुल गांधींच्या आरोपांवर फडणवीसांचा पलटवार

मुंबई : विरोधी पक्षनेते राहुल गांधी आणि काँग्रेसकडून निवडणूक आयोगावर करण्यात येणाऱ्या ‘व्होट चोरी’च्या आरोपांवर मुख्यमंत्री देवेंद्र फडणवीस यांनी जोरदार पलटवार केला आहे. तीनही निवडणूक आयुक्तांच्या 26 सप्टेंबरच्या बैठकीनंतर आयोगाने SIRसंदर्भातील निर्णय एकमताने झाल्याचे स्पष्ट केल्याचा संदर्भ देत, राहुल गांधी आणि त्यांच्या सहकाऱ्यांकडून मांडण्यात येणारे ‘नरेटिव्ह’ उधळून लागल्याचा दावा फडणवीस यांनी केला.

फडणवीस यांनी विरोधकांवर टीका करताना, ‘हे सतत मतचोरीचा जप करत आहेत; पण प्रत्यक्षात यांचा मेंदूच चोरीला गेलेला आहे,’ अशी खोचक टिप्पणी केली. विरोधकांचा ‘चोरीला गेलेला किंवा गहाण ठेवलेला मेंदू’ परत आणण्यासाठी एखादी चौकशी समिती किंवा व्यवस्था करता येईल का, अशी विनंती पंतप्रधान नरेंद्र मोदी यांना करणार असल्याचेही त्यांनी म्हटले.

‘भाजपला फायदा होईल असे निर्णय घेतल्याचा आरोप’

फडणवीस यांनी राहुल गांधी यांच्या निवडणूक आयोगावरील आरोपांवर टीका करताना, आयोगाच्या निर्णयांवरून घटनात्मक संस्थांवरील जनतेचा विश्वास कमी करण्याचा प्रयत्न होत असल्याचा दावा केला. त्यांनी EVMच्या मुद्द्याचाही उल्लेख करत काँग्रेसच्या भूमिकेवर प्रश्न उपस्थित केले.

पश्चिम बंगालमधील SIRचा संदर्भ देत फडणवीस यांनी काही मतदारसंघांमध्ये नावे कमी झाल्याच्या दाव्यावरून विरोधकांच्या आरोपांवर प्रश्न उपस्थित केला. त्यांच्या मते, संबंधित मतदारसंघांमध्ये भाजपचे मतदार अधिक असल्याचा दावा केला जात असतानाही तिथे तृणमूल काँग्रेसचे उमेदवार विजयी झाले; त्यामुळे ‘व्होट चोरी’च्या आरोपांवर त्यांनी आक्षेप घेतला.

हेही वाचा –  मुंबईतील शिंदेसेनेच्या पदाधिकाऱ्याला जीवे मारण्याची धमकी; विक्रोळी पोलिसांकडून संशयित ताब्यात

‘राहुल गांधींची मानसिकता अति-डावी’

राहुल गांधी संविधानाचे पुस्तक हातात घेऊन घटनात्मक संस्थांवर आरोप करत असल्याची टीका फडणवीस यांनी केली. राहुल गांधी यांची राजकीय भूमिका ‘अति-डावी’ झाल्याचा दावा करत, देशातील घटनात्मक संस्थांवरील जनतेचा विश्वास कमी करण्याचा प्रयत्न होत असल्याचे त्यांनी म्हटले.

दरम्यान, निवडणूक आयोगाने 26 सप्टेंबरच्या पूर्ण आयोगाच्या बैठकीनंतर SIRशी संबंधित निर्णय सर्व तीन आयुक्तांच्या मंजुरीने झाल्याचे स्पष्ट केले आहे. SIRदरम्यान ‘unmapped’ किंवा ‘logical discrepancies’ची नोटीस मिळालेल्या मतदारांच्या घरी BLO जाऊन कागदपत्रे घेतील, अशी प्रक्रिया आयोगाने जाहीर केली आहे. तसेच महाराष्ट्रातील दावे-हरकती दाखल करण्याची मुदत 12 ऑक्टोबरपर्यंत वाढवण्यात आली आहे.

फडणवीस यांनी कॅबिनेट मंत्र्यांकडे गेलेल्या पत्राबाबतच्या वृत्तांवरही स्पष्टीकरण दिले. हे पत्र दोन लाख मतपत्रिकांशी संबंधित नसून प्रतिनियुक्तीवरील अधिकाऱ्याच्या नियुक्तीबाबत असल्याचा दावा त्यांनी केला. तसेच Form-6 संदर्भातील प्रक्रिया सर्वोच्च न्यायालयाने ठरवलेल्या नियमांनुसार असल्याचेही त्यांनी म्हटले.

निवडणूक आयोगाच्या कामकाजावरून सत्ताधारी आणि विरोधकांमध्ये आरोप-प्रत्यारोप सुरू असतानाच फडणवीसांच्या या वक्तव्यामुळे ‘व्होट चोरी’ आणि SIRचा मुद्दा पुन्हा राजकीय चर्चेच्या केंद्रस्थानी आला आहे.

महाईन्यूज-X वर फॉलो करा : महाईन्यूजला instagram वर फॉलो करा