मुंबईतील शिंदेसेनेच्या पदाधिकाऱ्याला जीवे मारण्याची धमकी; विक्रोळी पोलिसांकडून संशयित ताब्यात

मुंबई : विक्रोळी पूर्वेतील टागोर नगर, ग्रुप क्रमांक ८ परिसरात युवासेना पदाधिकारी गणेश गौतम रोकडे यांना जीवे मारण्याची धमकी देण्यात आल्याची घटना समोर आली आहे. २६ सप्टेंबर रोजी दुपारी सुमारे २.३० ते ३ वाजण्याच्या दरम्यान भारत गॅस परिसरात हा प्रकार घडल्याचे सांगण्यात येत आहे. या घटनेनंतर परिसरात चर्चेला उधाण आले आहे.

मिळालेल्या माहितीनुसार, गणेश रोकडे हे मागील वर्षभरापासून विक्रोळी परिसरातील कथित ड्रग्सविरोधी कारवायांबाबत संबंधित यंत्रणांकडे तक्रारी करत असून, त्याचा सातत्याने पाठपुरावा करत आहेत. त्यांच्या तक्रारींच्या आधारे संबंधित यंत्रणांकडून कारवाई करण्यात आल्याचेही सांगितले जात आहे. याच पार्श्वभूमीवर त्यांना जीवे मारण्याची धमकी देण्यात आल्याची माहिती समोर आली आहे.

हेही वाचा –  ‘देशाचे दुश्मन ज्ञानेश कुमार’; निवडणूक आयोगाच्या बैठकीनंतर संजय राऊतांचा घणाघात

धमकीचा प्रकार घडल्यानंतर रोकडे यांनी तातडीने पोलिसांना माहिती दिली. घटनेचे गांभीर्य लक्षात घेत विक्रोळी पोलिसांनी तपास सुरू केला. धमकी देणाऱ्या व्यक्तीचा शोध घेत पोलिसांनी एका संशयिताला ताब्यात घेतल्याची माहिती आहे. या प्रकरणी तक्रार नोंदवण्यात आली असून, धमकीमागील नेमके कारण शोधण्यासाठी चौकशी सुरू आहे.

दरम्यान, ताब्यात घेण्यात आलेल्या संशयिताचा घटनेतील नेमका सहभाग काय आहे, धमकी देण्यामागील कारण काय आहे आणि या प्रकरणात आणखी कोणाचा सहभाग आहे का, याचा तपास पोलिसांकडून केला जात आहे. रोकडे यांनी यापूर्वी केलेल्या कथित ड्रग्सविरोधी तक्रारी आणि सध्याच्या धमकीच्या घटनेचा काही संबंध आहे का, या दिशेनेही तपास सुरू असल्याचे समजते.

पोलिसांच्या तपासातून या प्रकरणातील नेमकी पार्श्वभूमी आणि धमकीमागील कारण स्पष्ट होण्याची शक्यता आहे. तोपर्यंत या प्रकरणातील आरोप आणि संशयिताची भूमिका तपासाच्या निष्कर्षांनुसारच स्पष्ट होणार आहे.

महाईन्यूज-X वर फॉलो करा : महाईन्यूजला instagram वर फॉलो करा