‘देशाचे दुश्मन ज्ञानेश कुमार’; निवडणूक आयोगाच्या बैठकीनंतर संजय राऊतांचा घणाघात
SIRच्या मुद्द्यावरून निवडणूक आयोगावर पुन्हा टीका; ‘आता सारवासारव सुरू आहे’, असा राऊतांचा आरोप
मुंबई : निवडणूक आयोगातील कथित मतभेद आणि विशेष सघन पुनरिक्षण अर्थात SIRच्या मुद्द्यावरून राजकीय वातावरण तापले असताना, शिवसेना (उद्धव बाळासाहेब ठाकरे) खासदार संजय राऊत यांनी मुख्य निवडणूक आयुक्त ज्ञानेश कुमार यांच्यावर जोरदार टीका केली आहे. ज्ञानेश कुमार हे केंद्रातील सत्ताधाऱ्यांच्या इशाऱ्यावर काम करत असल्याचा आरोप राऊत यांनी केला. तसेच, ‘देशाचे दुश्मन हे ज्ञानेश कुमार आहेत’, अशी तीव्र प्रतिक्रिया त्यांनी दिली.
निवडणूक आयोगाचे मुख्य निवडणूक आयुक्त ज्ञानेश कुमार आणि निवडणूक आयुक्त सुखबीर सिंह संधू व विवेक जोशी यांची 26 सप्टेंबर रोजी बैठक झाली. या बैठकीनंतर आयोगाने SIRसंबंधी महत्त्वाचे निर्णय जाहीर करताना सर्व निर्णय एकमताने झाल्याचे स्पष्ट केले. SIRमध्ये ‘unmapped’ किंवा ‘logical discrepancies’ संदर्भात नोटीस मिळालेल्या मतदारांच्या घरी BLO जाऊन कागदपत्रे घेतील आणि सामान्य परिस्थितीत संबंधितांना ERO/AERO कार्यालयात प्रत्यक्ष सुनावणीसाठी बोलावले जाणार नाही.
मात्र, या बैठकीवरून संजय राऊत यांनी निवडणूक आयोगावर निशाणा साधला. ‘आता ते सारवासारव करत आहेत. आम्ही कोर्टातही SIRविषयी याचिका केल्या; मात्र त्या फेटाळण्यात आल्या,’ असा दावा राऊत यांनी केला.
‘लोकशाहीची हत्या होत आहे’
संजय राऊत म्हणाले की, ज्ञानेश कुमार हे लोकशाहीविरोधात काम करत असून भाजपला फायदा होईल, असे निर्णय घेतले जात असल्याचा त्यांचा आरोप आहे. दोन निवडणूक आयुक्तांनी आक्षेप नोंदवल्याचा संदर्भ देत त्यांनी आयोगाच्या कामकाजावर प्रश्न उपस्थित केले. SIRमुळे मोठ्या प्रमाणावर मतदारांची नावे वगळली गेल्याचा दावाही त्यांनी केला.
महाराष्ट्रासह दिल्ली आणि पश्चिम बंगालमध्येही निवडणूक प्रक्रियेबाबत प्रश्न उपस्थित होत असल्याचे राऊत म्हणाले. या मुद्द्यावर विविध पक्ष आणि संघटनांकडून आंदोलनाची भूमिका घेतली जात असल्याचे त्यांनी सांगितले.
‘महाराष्ट्रातील पक्षांनी एकत्र यावे’
SIRच्या मुद्द्यावर महाराष्ट्रातील विविध राजकीय पक्षांनी स्वतंत्र मोर्चांऐवजी एकत्रितपणे आंदोलन करावे, असे आवाहन राऊत यांनी केले. मनसे आणि शिवसेनेसह महाराष्ट्रातील सर्व राजकीय पक्षांशी चर्चा करण्याची तयारी सुरू असल्याचे त्यांनी सांगितले.
दरम्यान, 26 सप्टेंबरच्या आयोगाच्या बैठकीनंतर निवडणूक आयोगाने अंतर्गत मतभेदांच्या वृत्तांवर स्पष्टीकरण देत SIRसह महत्त्वाचे निर्णय तिन्ही आयुक्तांच्या एकमताने झाल्याचे म्हटले आहे. आयोगाने ECINETच्या कामकाजाचा स्वतंत्र आढावा घेण्यासाठी तज्ज्ञ समिती स्थापन करण्याचाही निर्णय घेतला आहे. महाराष्ट्रात SIRसाठी दावे-हरकती दाखल करण्याची मुदत 12 ऑक्टोबरपर्यंत वाढवण्यात आली आहे.
त्यामुळे निवडणूक आयोगाच्या अधिकृत स्पष्टीकरणानंतरही SIR आणि आयोगाच्या कामकाजावरून राजकीय आरोप-प्रत्यारोप सुरूच असल्याचे चित्र आहे.
महाईन्यूज-X वर फॉलो करा : महाईन्यूजला instagram वर फॉलो करा
