‘अन्न सुरक्षेचे नियम आहेत, मात्र पालन होत नाही’; तुकाराम मुंढेंचे भेसळखोरांवर स्पष्ट भाष्य
सार्वजनिक आरोग्याच्या दृष्टीने कारवाई; सणासुदीत मिठाई, दूध आणि दुग्धजन्य पदार्थांची तपासणी आणखी कडक होणार
मुंबई : महाराष्ट्रात अन्न व औषध प्रशासनाकडून (FDA) अन्न व्यवसायांवर आणि भेसळखोरांविरोधात सुरू असलेल्या कारवाईचे FDA आयुक्त तुकाराम मुंढे यांनी समर्थन केले आहे. देशात अन्न सुरक्षेसाठी कडक नियम आणि कायदे आधीपासूनच उपलब्ध आहेत; मात्र त्यांचे प्रभावीपणे पालन न होणे ही मोठी समस्या असल्याचे त्यांनी स्पष्ट केले.
गुजरातमधील गांधीनगर येथे आयोजित कार्यक्रमात बोलताना मुंढे यांनी सांगितले की, अन्न सुरक्षेबाबतची मोहीम कोणत्याही व्यापारी किंवा हॉटेल व्यावसायिकाला वैयक्तिक लक्ष्य करण्यासाठी नाही. ही कारवाई सार्वजनिक आरोग्याचे संरक्षण आणि अन्न सुरक्षा नियमांचे पालन सुनिश्चित करण्यासाठी केली जात असल्याचे त्यांनी स्पष्ट केले.
‘आपण काय खातो, त्यावर आरोग्य अवलंबून’
अशुद्ध आणि निकृष्ट दर्जाच्या अन्नपदार्थांचा थेट परिणाम नागरिकांच्या आरोग्यावर होत असल्याचे मुंढे यांनी नमूद केले. अन्न सुरक्षेशी संबंधित नियम देशात आधीपासून अस्तित्वात आहेत; मात्र त्यांची गांभीर्याने अंमलबजावणी आणि पालन होणे आवश्यक असल्याचे त्यांनी सांगितले.
देशात मधुमेह, उच्च रक्तदाब आणि हृदयविकारासारख्या बिगर-संसर्गजन्य आजारांचे प्रमाण वाढत असल्याकडेही त्यांनी लक्ष वेधले. आपण दररोज काय खातो आणि काय पितो, याचा आरोग्यावर परिणाम होत असल्याचे त्यांनी सांगितले.
हेही वाचा – दुष्काळाच्या जीआरवर रोहिणी खडसेंचे सरकारला ५ सवाल; ‘शेतकऱ्यांना प्रत्यक्ष मदत कधी?’
अस्वच्छता आणि भेसळीविरोधात कडक कारवाई
मे महिन्यात FDA आयुक्तपदाचा पदभार स्वीकारल्यानंतर राज्यात अन्न सुरक्षेबाबत तपासणी आणि कारवाईला वेग आला आहे. अन्न व्यवसायाच्या ठिकाणी अस्वच्छता, कीटक किंवा भेसळ आढळल्यास नियमांनुसार परवाना निलंबित किंवा रद्द करण्याची कारवाई केली जात आहे.
दरम्यान, आगामी सण-उत्सवांच्या पार्श्वभूमीवर मिठाई, दूध आणि दुग्धजन्य पदार्थांमध्ये भेसळ होण्याची शक्यता लक्षात घेऊन तपासणी मोहीम अधिक तीव्र करण्याचे प्रशासनाचे नियोजन आहे. किरकोळ त्रुटी आढळल्यास सुधारणा करण्याची संधी दिली जाऊ शकते; मात्र ग्राहकांच्या आरोग्याला गंभीर धोका निर्माण करणाऱ्या प्रकरणांमध्ये कठोर कारवाई केली जाणार असल्याचे प्रशासनाने स्पष्ट केले आहे.
अन्न सुरक्षेच्या नियमांचे पालन करून नागरिकांना सुरक्षित आणि दर्जेदार अन्न उपलब्ध करून देणे, हा या मोहिमेचा मुख्य उद्देश असल्याचे FDAकडून स्पष्ट करण्यात आले आहे.
महाईन्यूज-X वर फॉलो करा : महाईन्यूजला instagram वर फॉलो करा
