WPL 2027 च्या ऑक्शनची तारीख ठरली; २८ ऑक्टोबरला कोचीमध्ये रंगणार ऑक्शन

नवी दिल्ली : भारतीय क्रिकेट नियामक मंडळाने (BCCI) महिला प्रीमिअर लीगच्या (WPL) आगामी हंगामाच्या तारखा जाहीर केल्या आहेत. WPL 2027 चा पाचवा हंगाम १४ जानेवारी ते ७ फेब्रुवारी २०२७ या कालावधीत खेळवला जाणार आहे. यासोबतच आगामी हंगामासाठीचा खेळाडूंचा लिलाव म्हणजेच ऑक्शन २८ ऑक्टोबर २०२६ रोजी कोची येथे होणार असल्याची माहिती बीसीसीआयने दिली आहे.

WPL 2027 चे संपूर्ण वेळापत्रक अद्याप जाहीर करण्यात आलेले नाही. त्यामुळे सामने कोणत्या शहरांमध्ये आणि कोणत्या मैदानांवर खेळवले जातील, याबाबतही अधिकृत माहिती समोर आलेली नाही. काही वृत्तांनुसार वडोदरा आणि मुंबईमध्ये सामने होण्याची शक्यता आहे. वाराणसीतील नव्या मैदानाचाही पर्याय चर्चेत असल्याचे सांगितले जात आहे; मात्र याबाबत बीसीसीआयकडून अद्याप अधिकृत घोषणा झालेली नाही.

हेही वाचा –  दिशा सालियन प्रकरणावर आदित्य ठाकरेंची पहिली प्रतिक्रिया; “मी त्यांना कधीही भेटलो नाही”

२८ सप्टेंबरपर्यंत रिटेन-रिलीज

बीसीसीआयच्या प्रसिद्धीपत्रकानुसार WPLमधील पाचही संघांना खेळाडूंना रिटेन किंवा रिलीज करण्यासाठी २८ सप्टेंबर २०२६ पर्यंतची मुदत देण्यात आली आहे. ऑक्शनच्या सुमारे महिनाभर आधी संघांना आपली अंतिम रिटेन्शन यादी सादर करावी लागणार आहे.

WPLच्या नियमानुसार एका संघाच्या स्क्वॉडमध्ये कमाल १८ खेळाडू असू शकतात. यामध्ये जास्तीत जास्त ६ परदेशी खेळाडूंचा समावेश करता येतो. संघातील खेळाडूंसाठी निश्चित केलेली कमाल किंमत १५ कोटी रुपयांपर्यंत आहे.

RCBकडे २०२६चे विजेतेपद

दरम्यान, WPL 2026 च्या हंगामात रॉयल चॅलेंजर्स बंगळुरूने (RCB) विजेतेपद पटकावले होते. स्मृती मानधनाच्या नेतृत्वाखाली RCBने अंतिम सामन्यात दिल्ली कॅपिटल्सचा ६ विकेट्सनी पराभव केला होता. या सामन्यात स्मृती मानधनाने ४१ चेंडूंमध्ये ८७ धावांची खेळी करत प्लेअर ऑफ द मॅचचा पुरस्कार मिळवला.

RCBने यापूर्वी २०२४ मध्येही WPLचे विजेतेपद मिळवले होते. त्यामुळे २०२६च्या विजेतेपदासह बंगळुरूने स्पर्धेच्या इतिहासात दोन विजेतेपदांची नोंद केली आहे.

महाईन्यूज-X वर फॉलो करा : महाईन्यूजला instagram वर फॉलो करा