पुण्यात फडणवीसांना मराठा आंदोलकांचा घेराव; दुसरीकडे जरांगेंची प्रकृती खालावली

पुणे : मराठा आरक्षणाच्या मागणीसाठी मनोज जरांगे पाटील मुंबईच्या दिशेने रवाना झाले असताना राज्यातील आंदोलनाची तीव्रता वाढताना दिसत आहे. पुण्यात मराठा आंदोलकांनी मुख्यमंत्री देवेंद्र फडणवीस यांना घेराव घालण्याचा प्रयत्न केला. केंद्रीय राज्यमंत्री मुरलीधर मोहोळ यांच्या निवासस्थानी मुख्यमंत्री गणेशदर्शनासाठी आले असताना आंदोलकांनी बाहेर घोषणाबाजी केली. पोलिसांनी हस्तक्षेप करत काही आंदोलकांना ताब्यात घेतल्यानंतर परिस्थिती नियंत्रणात आली.

मुख्यमंत्री देवेंद्र फडणवीस हे बुधवारी केंद्रीय राज्यमंत्री मुरलीधर मोहोळ यांच्या पुण्यातील निवासस्थानी गणेशदर्शनासाठी आले होते. त्यावेळी मराठा आंदोलकांनी तेथे पोहोचून मुख्यमंत्र्यांच्या विरोधात घोषणाबाजी केली. आंदोलकांनी मुख्यमंत्र्यांना घेराव घालण्याचा प्रयत्न केल्याचे वृत्त आहे.

पोलिसांनी सुरुवातीला आंदोलकांना समजावण्याचा प्रयत्न केला. मात्र घोषणाबाजी सुरू राहिल्याने पोलिसांनी हस्तक्षेप करून काही आंदोलकांना ताब्यात घेतले. त्यानंतर परिसरातील परिस्थिती नियंत्रणात आली.

हेही वाचा –  WPL 2027 च्या ऑक्शनची तारीख ठरली; २८ ऑक्टोबरला कोचीमध्ये रंगणार ऑक्शन

१९ दिवसांच्या उपोषणानंतर जरांगेंची प्रकृती खालावली

दरम्यान, मराठा आरक्षण आंदोलनाचे नेतृत्व करणारे मनोज जरांगे पाटील सध्या मुंबईच्या दिशेने प्रवास करत आहेत. १९ दिवसांच्या उपोषणानंतर बीड जिल्ह्यातील पाटोदा येथे त्यांची प्रकृती खालावली. वैद्यकीय पथकाने तपासणी केल्यानंतर त्यांना रुग्णालयात दाखल करण्याचा सल्ला दिला आहे.

बीडचे जिल्हा शल्यचिकित्सक डॉ. सतीशकुमार सोळंके यांनी जरांगे यांना तीव्र निर्जलीकरणाचा धोका असल्याचे सांगितले. त्यांचा रक्तदाब आणि रक्तातील साखरेची पातळी कमी झाल्याचेही डॉक्टरांनी नमूद केले. केवळ सलाईन देऊन प्रवास करण्याची स्थिती नसून रुग्णालयात दाखल होण्याची गरज असल्याचे डॉक्टरांनी सांगितले.

अंतरवाली सराटी येथून सुमारे १४ तासांचा प्रवास करून जरांगे पाटोदा येथे पोहोचले. प्रकृती खालावल्याने मुंबईचा प्रवास पुढे सुरू ठेवता येईल की नाही, याबाबत त्यांनीही अनिश्चितता व्यक्त केली. मात्र, मराठा आरक्षणाचा मुद्दा आपल्यासाठी महत्त्वाचा असल्याचे सांगत त्यांनी आंदोलन सुरू ठेवण्याचा निर्धार व्यक्त केला आहे.

मुंबई आंदोलनाला पोलिसांची परवानगी नाही

मनोज जरांगे यांनी मुंबईतील आझाद मैदानावर आंदोलन करण्याची तयारी केली आहे. मात्र, गणेशोत्सवाच्या पार्श्वभूमीवर कायदा-सुव्यवस्थेचा मुद्दा पुढे करत मुंबई पोलिसांनी त्यांच्या आंदोलनाला परवानगी नाकारली आहे. जरांगे यांनी मात्र मुंबईकडे जाण्याचा निर्णय कायम ठेवला आहे.

दरम्यान, त्यांच्या प्रकृतीमुळे मुंबईकडे सुरू असलेल्या प्रवासावर प्रश्नचिन्ह निर्माण झाले आहे. डॉक्टरांचा रुग्णालयात दाखल होण्याचा सल्ला आणि जरांगेंचा आंदोलन सुरू ठेवण्याचा निर्धार यामुळे पुढील काही तास महत्त्वाचे ठरणार आहेत.

महाईन्यूज-X वर फॉलो करा : महाईन्यूजला instagram वर फॉलो करा