“डीजे बंदीमुळे काहींना वाईट वाटत असेल तर वाटू द्या”; संजय शिरसाट यांचा डीजेबंदीला स्पष्ट पाठिंबा
“लहान मुले, वयोवृद्ध आणि आजारी व्यक्तींना मोठा त्रास होतो”; गणेशोत्सवाच्या पार्श्वभूमीवर शिरसाटांनी मांडली भूमिका
मुंबई : गणेशोत्सवाच्या पार्श्वभूमीवर राज्यात डीजे आणि ध्वनिप्रदूषणाचा मुद्दा चांगलाच चर्चेत आला आहे. पुण्यातील सामाजिक कार्यकर्ते विद्यानंद बापट यांनी सार्वजनिक उत्सवांमध्ये डीजे आणि लाऊडस्पीकरचा वापर करू नये, अशी भूमिका घेतल्यानंतर या मुद्द्यावर विविध स्तरांतून प्रतिक्रिया उमटत आहेत. आता शिवसेना शिंदे गटाचे नेते आणि सामाजिक न्याय मंत्री संजय शिरसाट यांनी डीजेबंदीचे जाहीर समर्थन केले आहे.
टीव्ही9 मराठीशी संवाद साधताना संजय शिरसाट यांनी डीजेमुळे लहान मुले, वयोवृद्ध आणि आजारी व्यक्तींना मोठा त्रास होत असल्याचे सांगितले. “डीजे बंदीमुळे काही लोकांना वाईट वाटत असेल तर वाटू द्या,” असे स्पष्ट मत त्यांनी व्यक्त केले.
“लहान बालकं, वयोवृद्ध लोक तसेच आजारी लोक असतील, त्यांना डीजेचा प्रचंड त्रास होतो. लहान मुलं मिरवणुकीत येत नाहीत. ते मिरवणुका पाहूही शकत नाहीत. ज्या-ज्या ठिकाणांहून मिरवणूक जाते, तेथील लोकांना त्याचा त्रास होतो, हे आपण नाकारू शकत नाही,” असे शिरसाट म्हणाले.
दरम्यान, गणेशोत्सव जवळ येत असताना डीजेच्या मुद्द्यावरून राज्यातील राजकीय वातावरणही तापले आहे. पुण्यातील विद्यानंद बापट यांनी सार्वजनिक उत्सवांमध्ये डीजे आणि लाऊडस्पीकरच्या वापराला विरोध केल्यानंतर त्यांच्या भूमिकेची सोशल मीडियावर मोठी चर्चा झाली.
नागपुरात गणेशोत्सवाच्या काळात डीजेवर बंदी घालण्यात आली आहे. त्याच पार्श्वभूमीवर आता राज्यातील इतर भागांमध्येही डीजेच्या वापराबाबत काय भूमिका घेतली जाते, याकडे लक्ष लागले आहे.
सण-उत्सव साजरे करताना नागरिकांचे मनोरंजन आणि परंपरा यासोबतच ध्वनिप्रदूषणाचा प्रश्नही महत्त्वाचा असल्याचे शिरसाटांच्या भूमिकेतून अधोरेखित झाले आहे. गणेशोत्सवाच्या काळात डीजेच्या वापराबाबत प्रशासन आणि गणेश मंडळांकडून कोणती भूमिका घेतली जाते, हे पाहणे महत्त्वाचे ठरणार आहे.
महाईन्यूज-X वर फॉलो करा : महाईन्यूजला instagram वर फॉलो करा
