गणेशोत्सवातील महाप्रसादासाठी स्वतंत्र नवा नियम नाही; FDA आयुक्त तुकाराम मुंढे यांचे स्पष्टीकरण

तुकाराम मुंढे यांनी पत्रकार परिषदेत सांगितले की, खाद्यपदार्थांचा व्यवसाय करणाऱ्या प्रत्येक व्यक्ती किंवा संस्थेने आवश्यक परवाना अथवा नोंदणी करून नियमानुसार अन्नपदार्थ पुरवणे अपेक्षित आहे. नियमांचे उल्लंघन आढळल्यास संबंधितांवर कारवाई केली जाईल. मात्र, ही कारवाई केवळ गणेशोत्सव किंवा महाप्रसादामुळे केली जात नसून ती FDA च्या नियमित नियामक प्रक्रियेचा भाग आहे.

दरम्यान, अन्न सुरक्षेच्या दृष्टीने FDA कडून राज्यभर तपासणी मोहीम सुरू आहे. ३१ जुलैपर्यंत अन्न क्षेत्रातील ३,१०० हून अधिक आस्थापनांची तपासणी करण्यात आली. यामध्ये १६५ आस्थापनांचे परवाने तात्काळ निलंबित करण्यात आले असून, ७५० हून अधिक आस्थापनांना आवश्यक सुधारणा करण्यासाठी नोटिसा बजावण्यात आल्या आहेत.

हेही वाचा –  सिंधुदुर्ग-कोल्हापूर प्रवास होणार सुसाट; ४० वर्षांपासून रखडलेल्या घोटगे-सोनवडे घाटमार्गाला केंद्राची मंजुरी

निलंबित करण्यात आलेल्या परवान्यांपैकी सुमारे १०५ आस्थापनांनी अपील केले असून, त्यापैकी सुमारे ७० आस्थापनांना प्राथमिक दिलासा मिळाला आहे. संबंधित ठिकाणी आवश्यक सुधारणा करण्यात आल्या आहेत का, याची अधिकाऱ्यांकडून पुन्हा तपासणी आणि पडताळणी केली जाणार आहे. सुधारणा समाधानकारक आढळल्यास निलंबन मागे घेतले जाऊ शकते. मात्र, नियमांचे पालन न झाल्यास कारवाई कायम राहणार आहे.

सार्वजनिक आरोग्याला तातडीचा धोका निर्माण होण्याची शक्यता असल्यासच परवाना तात्काळ निलंबित करण्याची कारवाई केली जाते, असेही मुंढे यांनी स्पष्ट केले. FDA च्या कारवाईनंतर अनेक रेस्टॉरंट आणि खाद्य व्यावसायिकांनी स्वतःहून स्वयंपाकघरांची स्वच्छता, नूतनीकरण आणि इतर आवश्यक सुधारणा सुरू केल्याचे त्यांनी सांगितले.

गणेशोत्सवाच्या पार्श्वभूमीवर महाप्रसाद आणि भंडाऱ्यांबाबत नागरिकांमध्ये निर्माण झालेला संभ्रम दूर करताना, FDA ने स्पष्ट केले आहे की सणांसाठी स्वतंत्र नवा नियम नसला तरी अन्नाची गुणवत्ता, स्वच्छता आणि सुरक्षिततेबाबतच्या विद्यमान नियमांचे पालन सर्वांसाठी बंधनकारक आहे.

महाईन्यूज-X वर फॉलो करा : महाईन्यूजला instagram वर फॉलो करा